Videodan kadr

Ijtimoiy tarmoqlarda Mirzo Ulugʻbek tumani Feruza koʻchasida joylashgan 9-, 11- va 13-sonli koʻp qavatli uylar oraligʻida olib borilayotgan qurilish hududida daraxtlar yoʻq qilinganligi mazmunda murojaat tarqaldi. Mazkur holat yuzasidan Toshkent shahar Ekologiya va iqlim oʻzgarishi bosh boshqarmasining Mirzo Ulugʻbek tumani inspektori tomonidan joyiga chiqib oʻrganish ishlari olib borildi.

Maʼlum qilinishicha, oʻrganishlar natijasida katlavan qazish vaqtida 1 tup shumtol daraxti agʻdarib tushgani hamda 1 tup archaning ildiz qismiga zarar yetkazilgani aniqlangan.

Mazkur holat yuzasidan Maʼmuriy javobgarlik toʻgʻrisidagi kodeksining 79-moddasi 1-qismiga asosan maʼmuriy bayonnoma rasmiylashtirilib, 10 300 000 soʻm miqdorida jarima qoʻllanilgan hamda tabiatga yetkazilgan zarar sifatida 14 832 000 soʻm undirilishi belgilangan.

Shuningdek, ushbu holat yuzasidan toʻplangan barcha hujjatlar va materiallar amaldagi qonunchilikda belgilangan tartibda koʻrib chiqish hamda huquqiy baho berish uchun Maʼmuriy javobgarlik toʻgʻrisidagi kodeksining 245-moddasi 3-qismiga muvofiq Jinoyat ishlari boʻyicha Mirzo Ulugʻbek tuman sudiga yuborilgan.