AQSH prezidenti Donald Tramp Yevropa Rossiyaga nisbatan joriy etgan cheklovlarni yetarli darajada qattiq emasligini aytdi. Uning taʼkidlashicha, Vashington Moskvaga qarshi yanada kuchli sanksiyalar joriy etishga tayyor, ammo bu faqat Yevropaning oʻzi ham choralarni kuchaytirgan taqdirdagina amalga oshiriladi. Bu haqda DW xabar berdi.

“Yevropa Rossiyadan neft sotib olishda davom etmoqda. Men ularning neft xarid qilishlarini xohlamayman. Ular qoʻllayotgan sanksiyalar yetarlicha qatʼiy emas. Men sanksiya joriy qilishni xohlayman, ammo ular men qilgan ishga mos ravishda oʻz choralarini kuchaytirishlari shart”, — degan AQSH rahbari jurnalistlar oldidagi chiqishida.

Bundan oldin Tramp Truth Social ijtimoiy tarmogʻida xat eʼlon qilib, NATOga aʼzo barcha davlatlar birgalikda kelishgan holda Rossiyaga qarshi jiddiy sanksiyalar joriy etganda va Moskvadan neft xarid qilishni toʻxtatganda Vashington oʻz cheklovlarini kuchaytirishini bildirgan edi.

Sentyabr oyi boshida esa u Yevropa rahbarlarini Ukrainadagi urushni “moliyalashtirayotgani” uchun tanqid qilgan va ularni Rossiya neftidan voz kechishga chaqirgan.