Kecha Osiyo qitʼasida “Jahon chempionati—2026” uchinchi saralash bosqichining yakuniy tur oʻyinlari boʻlib oʻtdi va toʻgʻridan-toʻgʻri JCHga chiqqan terma jamoalar nomi maʼlum boʻldi.

“A” guruhida Eron KXDRni 3:0 hisobida magʻlub etib, guruh gʻolibiga aylandi. Oʻzbekiston esa Qatar ustidan yirik gʻalabaga erishib (3:0), mundialga yoʻllanmani muddatidan avval taʼminlab boʻlgan holda saralashni yuqori notada yakunladi. Qirgʻiziston va BAA oʻrtasidagi uchrashuv 1:1 hisobida durang bilan yakunlandi, ammo bu natija ikki jamoa uchun ham hal qiluvchi ahamiyatga ega boʻlmadi.

“V” guruhida Janubiy Koreya va Iordaniya allaqachon toʻgʻridan-toʻgʻri yoʻllanmani qoʻlga kiritgan edi. Oxirgi tur oldidan Iroq, Oʻmon va Falastin 3-oʻrin uchun kurashda edi. Iroq Iordaniyani magʻlub etib pley-off yoʻllanmasiga ega chiqdi. Oʻmon va Falastin oʻrtasidagi oʻyin keskin oʻtdi — falastinliklar faqat gʻalaba bilan keyingi bosqichga chiqishi mumkin edi. Ular hisobni ochishganiga qaramay, oʻyinga qoʻshib berilgan daqiqalarda Oʻmon penalti orqali gol urib, durangni saqlab qoldi va keyingi bosqichga yoʻl oldi.

“S” guruhida Yaponiya mundialga yoʻllanmani oldinroq taʼminlab qoʻygan edi. Uning ortidan ikkinchi oʻrin uchun kurashgan Avstraliya va Saudiya Arabistoni oʻrtasida jiddiy raqobat kechdi. Saudiyaliklarga Avstraliyani yirik hisobda magʻlub etish talab etilgan, ammo oʻz maydonida 1:2 hisobida magʻlub boʻlishdi va pley-off bosqichida ishtirok etishga majbur boʻlishdi.

Natijada, Osiyo qitʼasidan JCH-2026 final bosqichiga toʻgʻridan-toʻgʻri yoʻl olgan jamoalar quyidagilar: Yaponiya, Eron, Oʻzbekiston, Iordaniya, Janubiy Koreya va Avstraliya. Ushbu olti jamoa saralashni muvaffaqiyatli yakunlab, mundialga chiptasini qoʻlga kiritishdi.

Qolgan yoʻllanmalar uchun esa pley-off bosqichida kurash davom etadi. BAA, Qatar, Iroq, Oʻmon, Saudiya Arabistoni va Indoneziya jamoalari ikki guruhga boʻlinib, markazlashgan formatda musobaqa oʻtkazishadi. Har bir guruhdan faqat birinchi oʻrinni egallagan jamoa “JCH-2026” finaliga yoʻl oladi.

Guruhlarda ikkinchi oʻrinni egallagan jamoalar esa oʻzaro bellashishadi. Bu bellashuvda gʻalaba qozongan jamoa qitʼalararo pley-offda ishtirok etib, Jahon chempionatida qatnashish uchun yana bir imkoniyatga ega boʻladi. Shu bilan Osiyodagi saralash jarayonining asosiy bosqichi yakunlandi va keyingi bosqichdagi kurashlar yanada qizgʻin tus olishi kutilmoqda.