2025-yil 1-yanvardan poytaxt jamoat transporti yoʻnalishlarida (avtobus va metropoliten) bir yoʻlovchi qatnovi uchun cheklangan tarif – 3 000 (uch ming) soʻm etib belgilandi. Bu haqda Toshkent shahar hokimining tegishli qarori qabul qilingan.

Qayd etilishicha, bunda toʻlov elektron toʻlov tizimi orqali amalga oshirilganda hozirgidek oʻzgarishsiz qoladi — 1 700 soʻm.

Shuningdek, qaror bilan Toshkent shahri yoʻnalishlaridagi barcha avtobuslar salonida yoʻlkira haqini naqd pulda olish amaliyotidan voz kechiladi.

Naqd pul orqali avtobuslarda harakatlanish uchun Toshkent shahridagi bekatlarda va ular yaqinida oʻrnatilgan barcha toʻlov qurilmalari yaʼni, Paynet, MultiPay va Oson infokioskalari orqali bir martalik chipta (3000 soʻm evaziga) xarid qilish kerak boʻladi.

Shuningdek, almashish tariflari faqat ATTO transport kartasida mavjud boʻlib, ushbu transport kartasidan foydalanuvchi yoʻlovchilar 1 soat davomida avtobusdan uchinchi va toʻrtinchi marotaba harakatlanishlari mutlaqo bepul boʻladi.

Bundan tashqari, koʻp martalik — 2, 5, 7 kun amal qiladigan tarif rejalari ham joriy qilinadi.