Ботир МАДИЁРОВ/«Халқ сўзи». Қўқон давлат педагогика институти дефектология факультети талабаси Зарина Холиқова бир неча йиллардан буён ўз хонадонида таянч ҳаракат аъзолари, нутқ, эшитиш соҳасида нуқсони бор болалар учун қўшимча машғулотлар ўтказиб келади.

Ўтган давр мобайнида асосий ўқитиш жараёнига қўшимча инклюзив таълим самараси сифатида ўнлаб болаларнинг нутқи равон бўлиб, ўқиш, ёзишни ўрганди. Ҳозирда тенгдошларидан ажралмаган ҳолда мактабда ўқияпти. Шу тариқа имконияти чекланган ўғил-қизларга тенгдошлари қатори таълим-тарбия олишига кўмаклашилмоқда.

— Бундай ёшлар билан ишлашда ҳар бир болага ўзига хос ёндашув талаб этилади, — дейди Зарина. — Шу сабабли ўқитиш, қўшимча машғулотлар белгиланган инклюзив таълим дастури доирасида олиб борилади. Юксак меҳр туфайли бу каби болалар келажакда жамиятда ўз ўрнини топади.

Ўқувчилар ўртасида мураккаб жарроҳлик амалиёти ўтказган, боғча ёшидаги, 13 ёшгача бўлган болалар бор. Зарина улар билан ҳар куни қўшимча шуғулланиб, билим ва амалий кўникмаларини ошириб боради. Мулоқот қилиш, эшитиш, ҳаракатланиш билан боғлиқ нуқсонлари устида ишлайди.

Айтиш жоиз, Заринанинг онаси кўп йиллардан буён Қўқон шаҳар кар ва соқовлар жамияти раиси сифатида фаолият кўрсатади. Зарина ўз хонадонида қўшимча машғулотлар ўтказишдан ташқари сурдотаржимонлик ва сурдопедагоглик билан ҳам шуғулланади.