Иллюстратив фото

Пластик буюмлардаги бисфенол А (BPA) ва бошқа фенолларнинг кўпайиши юракнинг электр тизимида ўзгаришларга олиб келиши мумкин. АҚШнинг Цинциннати университети тиббиёт коллежи тадқиқотчилари шундай хулосага келишди.

BPA ва шунга ўхшаш бирикмалар қадоқлаш, пластик бутилкалар, квитанция қоғози, косметика ва бошқа истеъмол маҳсулотларини ишлаб чиқаришда кенг қўлланилади. Аввалги тадқиқотлар шуни кўрсатдики, бу нарсалар билан мунтазам алоқада бўлганда, феноллар аста-секин инсон танасида тўпланади. Ушбу фенолларга таъсир қилиш юрак касалликлари, аллергик реакциялар ва эндокрин бузилиш хавфининг ошиши билан боғлиқ.

Янги тадқиқот учун олимлар 600 кишининг соғлиғига оид маълумотларни, жумладан, уларнинг фенол даражаси ва юрак фаолияти кўрсаткичларини таҳлил қилдилар. Натижалар шуни кўрсатдики, қон ва тўқималарда бундай бирикмаларнинг юқори концентрацияси бўлган иштирокчилар юрак ритмининг бузилишини кўрсатадиган электрокардиограмма анормалликларини бошдан кечириш эҳтимоли кўпроқ.

Тадқиқотчиларнинг таъкидлашича, юрак хасталигига мойил бўлмаган соғлом одамларда бундай ўзгаришлар хавфи паст бўлиб қолмоқда. Бироқ, генетик омилларга эга бўлган ёки кекса ёшдаги одамларда фенолларга таъсир қилиш юрак муаммолари хавфини сезиларли даражада ошириши мумкин. Ҳатто паст концентрацияларда ҳам бу моддалар юрак-қон томир тизимига аста-секин таъсирга эга бўлиши мумкин.

Тадқиқотнинг кейинги босқичи аҳолининг энг заиф гуруҳларини аниқлаш ва кундалик ҳаётда бундай бирикмаларнинг таъсирини камайтириш бўйича тавсиялар ишлаб чиқишдан иборат бўлади.