Хивадаги Ичан Қалъа давлат музей-қўриқхонаси Кўҳна Арк тарихий-меъморий мажмуаси ёзги кинотеатрида анъанавий Корея кинофестивали бўлиб ўтди. Унда маҳаллий аҳоли вакиллари, ёшлар, вилоятдаги корейс миллий маркази фаоллари қатнашди.

Кинофестивалнинг тантанали очилиш маросимида Корея Республикасининг Ўзбекистондаги фавқулодда ва мухтор элчиси Вон До Ён иштирок этиб, йиғилганларга самимий ва эзгу тилакларини изҳор қилди. У ҳар икки давлат ўртасида барча соҳалар, хусусан, маданий-маърифий йўналишдаги ҳамкорлик ҳамда ўзаро ҳамдўстлик алоқалари мустаҳкамланиб бораётганини билдириб, Хоразмни, Хивани ўз юртимдай севиб қолдим дея эътироф этди.

Очилиш маросимидан сўнг, иштирокчилар ўртасида савол-жавоблар тариқасида викторина ўтказилиб, ғолибларга эсдалик совғалари топширилди. Корея киноижодкорлари томонидан суратга олинган “Менинг кучукчам Руни” номли филм намойиши барчага манзур бўлди.

Кинофестивалда хорижлик сайёҳлар ҳам иштирок этиб унутилмас таассуротлар олди.

— Бизнинг саёҳатимиз айнан фестивалга тўғри келгани айни муддао бўлди, — дейди белгиялик меҳмон Алис. — Тарихий манзараларни, музейларни кўриб ҳайратланиш баробарида кинофестивалда ҳам иштирок этганимиздан хурсандмиз. Меҳмондўстлик ва унутилмас хотиралар учун раҳмат!

Якунда тадбирда иштирок этган фаол томошабинларга ҳам эсдалик совғалари тақдим этилди. Барчага бирдек манзур бўлган ушбу фестивал давлатлар ва миллатларимиз ўртасидаги мустаҳкам ҳамдўстлик ифодасига айланди, десак, муболаға эмас.

Отабек ИСМОИЛОВ,

журналист.