Фото: Халқ сўзи

Янги йил байрамини ҳаммадан кўпроқ болажонлар орзиқиб кутишади. Байрам муносабати билан улашиладиган Янги йил совғалари уларга бир олам завқ-шавқ бағишлайди.

Кутилганидек, Термиз шаҳридаги “Iceberg” кўнгилочар масканида ўтказилган «Президент арчаси» тадбири шукуҳли ва эсда қоларли воқеаларга бой бўлди. Унда оилавий болалар уйи тарбияланувчилари, ота-она қаровисиз қолган ўғил-қизлар ҳамда Ватанимиз тинчлиги ва хавфсизлиги йўлида қурбон бўлган ҳарбий хизматчиларнинг фарзандлари иштирок этди.

Тадбир давомида Сурхондарё вилояти ҳокими вазифасини бажарувчи Улуғбек Қосимов болажонларни кириб келаётган янги йил билан қутлаб, уларга «Президент совғаси»ни топширди.

Шундан сўнг Қорбобо ва Қорқиз, турли эртак қаҳрамонлари иштирокидаги театрлаштирилган бадиий дастур намойиши иштирокчиларига янада хушкайфият улашди.

Маълумот ўрнида, Сурхондарё вилоятидаги оилавий болалар уйи тарбияланувчилари, Ватан сарҳадларини ҳимоялаш йўлида жон фидо қилган ўғлонларимиз ҳамда боқувчисини йўқотган оилаларнинг 3 ёшдан 15 ёшгача бўлган жами 655 нафар болажонга вилоят ҳокимлиги, туман ҳокимликлари, халқ таълими бошқармаси ҳамда кенг жамоатчилик вакиллари иштирокида «Президент совғаси» топширилди.

Илҳом Раҳматов,  «Халқ сўзи».