Foto: Xalq so‘zi

Yangi yil bayramini hammadan koʻproq bolajonlar orziqib kutishadi. Bayram munosabati bilan ulashiladigan Yangi yil sovgʻalari ularga bir olam zavq-shavq bagʻishlaydi.

Kutilganidek, Termiz shahridagi “Iceberg” koʻngilochar maskanida oʻtkazilgan “Prezident archasi” tadbiri shukuhli va esda qolarli voqealarga boy boʻldi. Unda oilaviy bolalar uyi tarbiyalanuvchilari, ota-ona qarovisiz qolgan oʻgʻil-qizlar hamda Vatanimiz tinchligi va xavfsizligi yoʻlida qurbon boʻlgan harbiy xizmatchilarning farzandlari ishtirok etdi.

Tadbir davomida Surxondaryo viloyati hokimi vazifasini bajaruvchi Ulugʻbek Qosimov bolajonlarni kirib kelayotgan yangi yil bilan qutlab, ularga “Prezident sovgʻasi”ni topshirdi.

Shundan soʻng Qorbobo va Qorqiz, turli ertak qahramonlari ishtirokidagi teatrlashtirilgan badiiy dastur namoyishi ishtirokchilariga yanada xushkayfiyat ulashdi.

Maʼlumot oʻrnida, Surxondaryo viloyatidagi oilaviy bolalar uyi tarbiyalanuvchilari, Vatan sarhadlarini himoyalash yoʻlida jon fido qilgan oʻgʻlonlarimiz hamda boquvchisini yoʻqotgan oilalarning 3 yoshdan 15 yoshgacha boʻlgan jami 655 nafar bolajonga viloyat hokimligi, tuman hokimliklari, xalq taʼlimi boshqarmasi hamda keng jamoatchilik vakillari ishtirokida “Prezident sovgʻasi” topshirildi.

Ilhom Rahmatov,  “Xalq soʻzi”.