Бразилия парламенти депутати Глаубер Брага АҚШ томонидан мамлакатга ҳужум қилиниши хавфини инобатга олишга чақирди. У РИА Новостига берган изоҳида Венесуэлага қилинган ҳужум ва президент Николас Мадуронинг қўлга олинишини шарҳлар экан, вазиятни минтақавий хавфсизлик учун жиддий таҳдид деб атади.

Браганинг таъкидлашича, бу масала тирик қолиш билан боғлиқ. «Улар Венесуэлага ҳужум қилди, энди эса Колумбия ва Кубага таҳдид қиляпти. Агар Бразилия ўз камёб ер ресурсларини итоаткорона топширмаса, навбат Бразилияга ҳам келиши мумкин. Шунинг учун бутун дунё бўйлаб кучли ва қатъий намойишлар ташкил этиш зарур», дейди у.

Маълумотларга кўра, Бразилия дунёдаги энг йирик камёб ер минераллари захираларидан бирига эга, бироқ улар ҳали етарлича ўрганилмаган ва соҳани ривожлантириш учун аниқ давлат тизими мавжуд эмас. Сўнгги ойларда президент Луис Инасиу Лула да Силва соҳани тартибга солиш бўйича қатор қадамлар ташлаб, мамлакат суверенитети ва мустақил қарор қабул қилиш салоҳиятини сақлашга урғу берган.

Сиёсатчи Лула ҳукуматини қўллаб-қувватловчи коалицияга кирувчи Социализм ва эркинлик партиясининг (PSOL) энг фаол депутатларидан бири ҳисобланади. У халқаро ҳамжамиятни АҚШга нисбатан янада қатъий позиция эгаллашга чақирди ҳамда содир бўлаётган воқеаларни Трамп раҳбарлигида амалга оширилаётган тажовуз сифатида баҳолади.

Брага Луланинг Венесуэлага қилинган ҳужум ва Мадуро ҳамда унинг рафиқаси Силия Флореснинг қўлга олинишини қоралаган позициясини ижобий баҳолади, аммо Бразилия президенти халқаро майдонда янада фаол бўлиши мумкинлигини таъкидлади. Унинг фикрича, Бразилия ҳукумати Мадуро ва Силия Флоресни озод этиш талаби билан глобал сафарбарликни мувофиқлаштирувчи асосий кучга айланиши керак.

Эслатиб ўтамиз, АҚШ 3 январь куни Венесуэлага оммавий зарба берган ва президент Николас Мадуро ва унинг рафиқаси Силия Флорес Нью-Йоркка олиб кетилган эди. АҚШда улар «наркотерроризм»да айбланмоқда. Каракас БМТнинг фавқулодда йиғилишини чақиришни сўраган, Венесуэла Олий суди эса вақтинчалик равишда давлат раҳбарлиги ваколатларини вице-президент Делси Родригесга юклаган. Россия, Хитой ва КХДР ташқи ишлар идоралари АҚШ ҳаракатларини халқаро ҳуқуқни бузиш деб баҳолаб, Мадуро ва унинг рафиқасини зудлик билан озод этишга чақирмоқда.