АҚШ президенти Дональд Трамп Конгрессда йиллик «Иттифоқ ҳолати» мурожаати билан чиқиш қилди. Қарийб 1 соат 48 дақиқа давом этган нутқ Қўшма Штатлар тарихидаги энг узун «Иттифоқ ҳолати» мурожаати сифатида қайд этилди.

Оқ уй раҳбари ўз нутқида асосий эътиборни мамлакат ичидаги асосий муаммолар, жумладан, чегара хавфсизлиги, инфляция ва аввалги маъмуриятдан мерос бўлиб қолган иқтисодий қийинчиликларга қаратган ҳамда америкаликлар учун «олтин давр» бошланишини ваъда қилган. Трамп АҚШнинг халқаро майдондаги нуфузи ошганини ҳам қўшимча қилган.

Трамп икки соатга яқин нутқи давомида Россия–Украина можаросини атиги бир марта тилга олган бўлиб, Қўшма Штатлар ушбу можарони тугатиш учун жиддий ҳаракат қилаётганини айтган. Бундан ташқари, Киев Америка қуролларини НАТО давлатлари орқали бепул эмас, балки тўлиқ нархда олишини ҳам билдириб ўтган. Трампнинг қўшимча қилишича, НАТО аъзолари ташкилот умумий бюджетига ялпи ички маҳсулотнинг 5 фоизи миқдорида ҳисса қўшиш бўйича келишувга эришган.

АҚШ президенти ушбу нутқи давомида Мексикадаги «Халиско янги авлоди» картели раҳбари «Эль Менчо» лақаби билан танилган Немесио Осегера Сервантеснинг йўқ қилинишида АҚШнинг ҳаракатларини ҳам эътироф этган. Мутахассислар фикрича, мазкур мурожаат Трампнинг ички сиёсат ва миллий хавфсизлик масалаларига устувор аҳамият қаратаётганини яна бир бор намоён этган.