Видеодан кадр

Тошкент вилоятидан пойтахтнинг Яшнобод тумани йўналиши бўйича такси хизматини кўрсатувчи ҳайдовчиларга таҳдид қилиб, улардан ўзбошимчалик билан ойлик тўлов ундириб келган жиноий тўда аъзолари ушланди. Бу ҳақда Ички ишлар вазирлиги хабар қилди.

Маълум қилинишича, Алимқулов Шерзод Умаралиевич исмли 1989 йилда Тошкент шаҳрида туғилган фуқаро мазкур жиноий гуруҳга бошчилик қилган. «Бычок» лақабини олган шахс спортнинг турли йўналишлари билан шуғулланиб келган. У муқаддам Жиноят кодексининг 277-моддаси билан уч маротаба судланган.

Ушбу шахс жиноий шериклари билан биргаликда «Damas» русумли автомашина ҳайдовчисини уриб, тан жароҳати етказган ва машинасининг калитини зўрлик ишлатиб олиб қўйган. Гуруҳ аъзолари доимий равишда ҳайдовчиларнинг йўналишда ҳаракат қилишига тўсқинлик қилиб келган.

Ариза муаллифининг ҳам ҳаёти ва соғлиғига жиддий зиён етказиш билан қўрқитиб, келгусида Яшнобод тумани ҳудудига қатновни амалга ошириш эвазига олдиндан икки ойлик тўлов сифатида 810 долларни олган. Кейинги тўловларни тўлиқ бера олмагани сабаб йўналишга чиқишини ўзбошимчалик билан тақиқлаб қўйган.

Мазкур ҳолат юзасидан жиноий гуруҳ етакчиси ва унинг шерикларига нисбатан Жиноят кодексининг 165-модда 2-қисми «в» банди билан жиноят иши қўзғатилган.

Ушбу тўда ҳаракатларидан азият кўрган фуқаролардан ички ишлар органларига ёки 102 қисқа рақамига қўнғироқ қилиш сўралди.