Видеодан кадр

Тошкент шаҳар Сергели туманида 37 ёшли ҳайдовчи иккита автобус ўртасида қолиб кетиши оқибатида ҳалок бўлди. Бу ҳақда «Тошшаҳартрансхизмат» АЖ хабар берди.

Қайд этилишича, кеча, 20 декабрь куни тахминан соат 16:56 ларда «1-автобус саройи» филиали тасарруфида бўлган «Yutong CNG» русумли, 55-йўналишда ҳаракатланадиган автобус ҳайдовчиси 55 ёшли И.А. (меҳнат фаолияти 35 йил, корхонада 1,5 бўлган) автобусни Сергели тумани Хонобод кўчаси бўйлаб бошқариб келиб, темирйўл кесишмасида поезд ўтаётгани сабабли тўхтатиб турган.

Шу вақтда унинг орқасида тўхтаб турган «12-автобус саройи» филиалига тегишли «Yutong CNG» русумли, сарой рақами 126-бўлган автобус ҳайдовчиси 37 ёшли Э.Р. (меҳнат фаолияти 17 йил, корхонада 1 йил) автобусни қўл тормозига қўймасдан пастга тушиб автобус олдига ўтган. Шундан сўнг, автобус ўз инерцияси билан юриб кетиб, ҳайдовчи Э.Р.ни сиқиб қўйган. Оқибатда бахтсиз ҳодиса содир бўлган.

Аниқланишича, мазкур бахтсиз ҳодиса «12-автобус саройи» филиали ҳайдовчисининг эҳтиётсизлиги оқибатида содир бўлган ва ҳайдовчи Э.Р. воқеа жойида вафот этган. Ҳозирда ушбу ҳодиса Тошкент шаҳар Ички ишлар бош бошқармаси тергов бўлими томонидан расмийлаштирилган.