Ўзбекистон миллий терма жамоасининг собиқ бош мураббийи Тимур Кападзе Наманганнинг «Навбаҳор» клуби бош мураббийи этиб тайинланди. Бу ҳақида клубнинг расмий саҳифасида маълумот берилди.

«Навбаҳор» футбол клуби бугун янги бош мураббий сифатида Тимур Кападзени расман таништиради.

Тажрибали мутахассис клуб раҳбарияти билан барча масалаларни муҳокама қилган ҳолда, жамоадаги келгуси режалар ва мақсадлар юзасидан тўлиқ келишувга эришди. Томонлар ўзаро шартнома имзолади.

Тимур Кападзе — Ўзбекистон футболининг энг таниқли вакилларидан бири бўлиб, мураббийлик фаолияти давомида ёшлардан тортиб миллий терма жамоагача бўлган турли даражадаги жамоаларни муваффақиятли бошқарган. Унинг қўл остида жамоалар халқаро майдонда йирик натижаларга эришган.

«Навбаҳор» ФК раҳбарияти Тимур Кападзенинг тажрибаси, профессионал қарашлари ва замонавий футболга оид ёндашуви клуб олдига қўйилган мақсадларни амалга оширишда муҳим ўрин тутишига ишонч билдиради, — дейилади клуб матбуот хизмати хабарда.

Маълумот учун, аввалроқ Тимур Тоҳирович Индонезия миллий терма жамоасини бошқариши мумкин эканлиги айтилганди.