Фото: Халқ сўзи

Солиқларнинг давлат бюджетини шакллантиришдаги, иқтисодиётни тартибга солиш ва ижтимоий барқарорликни таъминлашдаги ўрни ҳамда аҳамияти нечоғлик муҳим экани барчамизга яхши маълум.

— Биз тўлаётган солиқлар нафақат мамлакат иқтисодий-ижтимоий ҳаётини яхшилашга, балки фуқароларнинг бугуни ва эртанги куни учун мустаҳкам ижтимоий ҳимоя вазифасини ўташга хизмат қилишини ҳамма ҳам бирдек англайди, дейиш қийин, - дейди Асака туманидан якка тадбиркор Орзихон Аҳмадалиева. — Мен яшаш хонадонимда тикувчилик қилиб, даромад топаман. Яқинда якка тадбиркор сифатида давлат рўйхатидан ўтгач, молиявий кўмакка ҳам эга бўлдим. Энг муҳими, энди ишимдан кўнглим тўқ, солиқларни ўз вақтида тўлаш орқали давлат ва жамият олдидаги фарзимни бажараман. 

Андижон вилояти Асака туман давлат солиқ инспекцияси томонидан «Солиқчи – тадбиркорга кўмакчи» тамойили доирасида  «тадбиркорбай» тизими яратилгани  166 нафар норасмий ишловчи фуқароларнинг фаолияти қонунийлаштирилишига сабаб бўлди. Шунингдек, йилнинг ўтган даврида  503 нафар юридик шахсларга зарур кўмак кўрсатилиб, янги ташкил этилган  181 та тадбиркорлик субъекти муаммолари ўрганилди ва масъул ташкилотлар ҳамкорлигида ҳал этилди.

Саминжон ҲУСАНОВ, «Халқ сўзи».