Фото: Архив сурат

Гулистон туманининг Бешбулоқ маҳалласида яшовчи оиланинг икки аъзоси талабаликка қабул қилинди. Эътиборлиси, улардан бири бундан 31 йил олдин умумтаълим мактабини битирган 48 ёшли Абдумалик Саламов. Иккинчиси эса унинг қизи – Диёрахон Ҳамидова.

Абдумалик Саламов Тошкент давлат шарқшунослик университетининг фалсафа йўналиши сиртқи бўлимига, Диёрахон эса Ўзбекистон давлат жаҳон тиллари университетининг филология факультети корейс тили йўналишига ўқишга кирди.

Шундай қилиб, ушбу оиладаги талабалар 4 нафарга етди. Негаки, Абдумаликнинг яна икки фарзанди давлат гранти асосида, яъни Мадинабону Тошкент кимё–технологиялари институтининг Янгиер филиалида, Темурмалик эса Ўзбекистон Журналистика ва оммавий коммуникациялар университетида таълим олиб келмоқда. Ҳозир 9-синфда ўқиётган энг кичик фарзанд Интизор келгусида хорижий тил йўналиши бўйича олий ўқув юртида ўқишни ният қилган.

Абдумалик Саламовнинг турмуш ўртоғи Юлдузхон кўп йиллик бой тажриба ва малакага эга ҳамшира. Абдумаликнинг ўзи эса оддий ишчи. Шундан бўлсада, болалигидан китоб ва газета-журнал ўқишни канда қилмай келади. Унинг хонадонида ҳам китобхонлик энг асосий машғулотлардан бири. Буни мазкур оиланинг 2021 йилда “Энг яхши китобхон оила” танловининг вилоят босқичида иккинчи ўринни эгаллагани ҳам тасдиқлаб турибди.

Аҳмадали ШEРНАЗАРОВ, “Халқ сўзи”.