France Press ахборот агентлигининг ёзишича, Россия хакерлар ёрдамида шимолий Европада GPS (Global Positioning System) сигналларини бузаётганликда гумонланмоқда. Бу парвозларнинг кечикиши, ҳаводаги тирбандлик ва авиакомпаниялар орасида ҳаос ҳолатини юзага келтирган.

Айбловлар Финляндиянинг Финнаир компанияси самолёти GPS сигналлари билан боғлиқ муаммолар сабабли Эстониянинг Тарту аэропортига фавқулодда қўнганидан сўнг пайдо бўлди. Шимолий Европанинг кўплаб давлатлари авиакомпаниялари ўз ҳукуматларидан вазиятни чуқурроқ ўрганишни талаб қилмоқда. 2024 йил 7 мартда НАТОга қабул қилинган Швеция ташкилотдан кескин чоралар қўллашни сўраяпти.

Сўнгги бир йил ичида шимол бўйлаб парвоз амалга оширган 46 мингга яқин учоқ Болтиқ денгизи узра GPS билан боғлиқ муаммоларга дуч келган. Мутахассислар мазкур воқеаларни Москванинг Украина билан урушида Киевга ёрдам берганларга жавоб зарбаси сифатида баҳолашган.

Россиянинг махфий қуролларидан бири Тобол айнан GPS тизимларини ишдан чиқариш ва чалғитиш вазифаларини бажаради. Ҳозирча ушбу айбловларга Москва жавоб бермаган, аммо вазият далилланса, Шимолий Европада кескинлик янада ортиши мумкин.