иллюстратив сурат

Косон туманидаги Эсабой маҳалласи аҳли сабзичиликда ном қозонган. Маҳаллада сабзи экмаган ёки ундан даромад олмаган хонадонни топиш қийин.

—Маҳалламизни сабзичилик авлоддан-авлодга ўтиб келяпти, — дейди эсабойлик Худойназар Қувондиқов. – Чунки еримиз ва об-ҳавомиз шу экин тури учун жуда қулай ҳисобланади. Қолаверса, ота-боболаримиз қўллаб келган тажриба бизга қўл келмоқда. 8 сотихлик томорқамизда рўзғор учун керакли маҳсулотлар билан бир қаторда, сабзи экиб, яхши даромад оляпмиз. Ўтган йили кузги мавсумнинг ўзида 6 тоннадан ошиқ ҳосил олган эдик, натижада оиламизга 25 миллион сўм даромад келди. Бу йил янада юқорироқ маррани кўзлаб турибмиз.

Авваллари қашқадарёлик деҳқонлар томонидан етиштирилган сабзи асосан ички бозорга етказиб берилган бўлса, сўнгги йилларда ушбу маҳсулотнинг экспорт кўрсаткичлари ҳам ошиб бормоқда. Мисол учун, жорий йилнинг январь — май ойларида вилоятдан қиймати 1,9 миллион долларга тенг бўлган 4213,4 тонна сабзи экспорт қилинди.

Воҳалик деҳқонлар учун бу борадаги энг яхши хорижий бозор Қозоғистон бўлиб турибди. Беш ой давомида Қашқадарёдан Қозоғистонга 2354,2 тонна сабзи етказиб берилган. Шунингдек, Россияга 1789,7 тонна, Қирғизистонга 59,8 тонна, Тожикистонга эса 9,7 тонна сабзи экспорти амалга оширилган.

Жаҳонгир БОЙМУРОДОВ

«Халқ сўзи»