Koson tumanidagi Esaboy mahallasi ahli sabzichilikda nom qozongan. Mahallada sabzi ekmagan yoki undan daromad olmagan xonadonni topish qiyin.

—Mahallamizni sabzichilik avloddan-avlodga oʻtib kelyapti, — deydi esaboylik Xudoynazar Quvondiqov. – Chunki yerimiz va ob-havomiz shu ekin turi uchun juda qulay hisoblanadi. Qolaversa, ota-bobolarimiz qoʻllab kelgan tajriba bizga qoʻl kelmoqda. 8 sotixlik tomorqamizda roʻzgʻor uchun kerakli mahsulotlar bilan bir qatorda, sabzi ekib, yaxshi daromad olyapmiz. Oʻtgan yili kuzgi mavsumning oʻzida 6 tonnadan oshiq hosil olgan edik, natijada oilamizga 25 million soʻm daromad keldi. Bu yil yanada yuqoriroq marrani koʻzlab turibmiz.

Avvallari qashqadaryolik dehqonlar tomonidan yetishtirilgan sabzi asosan ichki bozorga yetkazib berilgan boʻlsa, soʻnggi yillarda ushbu mahsulotning eksport koʻrsatkichlari ham oshib bormoqda. Misol uchun, joriy yilning yanvar — may oylarida viloyatdan qiymati 1,9 million dollarga teng boʻlgan 4213,4 tonna sabzi eksport qilindi.

Vohalik dehqonlar uchun bu boradagi eng yaxshi xorijiy bozor Qozogʻiston boʻlib turibdi. Besh oy davomida Qashqadaryodan Qozogʻistonga 2354,2 tonna sabzi yetkazib berilgan. Shuningdek, Rossiyaga 1789,7 tonna, Qirgʻizistonga 59,8 tonna, Tojikistonga esa 9,7 tonna sabzi eksporti amalga oshirilgan.

Jahongir BOYMURODOV

“Xalq soʻzi”