Ботир МАДИЁРОВ/«Халқ сўзи». Айни кунларда Фарғона шаҳридаги маҳаллаларда аҳоли томорқаларидан унумли фойдаланиш, бу борада истиқболли ва интенсив лойиҳаларни амалга ошириш бўйича салмоқли натижаларга эришилмоқда.

Бунинг самараси сифатида маҳаллалар гулчилик, цитрус мевалар, қўзиқорин, турли кўкат ва сабзавотлар етиштиришга ихтисослашиб, оилалар қўшимча даромад манбаига эга бўляпти. Иссиқхоналарда эса йилнинг тўрт фаслида ҳам маҳсулот етиштириш имконияти яратилди.

Фарғона шаҳрининг чекка ҳудудида жойлашган «Хўжамағиз» МФЙ аҳли сабзавотчилик, чорвачилик, кўкат ва зираворлар етиштиришда миришкор ҳисобланади. Кейинги йилларда ушбу маҳалладаги хонадонларда бир ва кўп йиллик гулларни парваришлаш тобора оммалашиб бораётир.

— Оила аъзоларимиз биргаликда 25 сотих иссиқхонамизда 20 турдан ортиқ гуллар парвариши билан шуғулланамиз, — дейди «Хўжамағиз» МФЙнинг Улуғвор кўчасидаги хонадонда истиқомат қилувчи Улуғбек Тоштемиров. — Бу гулларнинг аксарияти хориждан келтирилган бўлиб, йилнинг тўрт фаслида ҳам очилади. Шу боис уларнинг харидори бисёр. Айнан гулчилик фаолияти орқали оиламиз даромади йилдан йилга яхшиланмоқда.

Иссиқхонада очилган анвойи гулларни кўриб, қиш кунларида баҳор нафасини ҳис этасиз. Эндиликда бу каби гулзорлар нафақат гўзаллик тимсоли, балки оилаларнинг муқим даромад манбаига айлангани ҳам эътиборга сазовордир.