Президентимизнинг куни кеча имзоланган «Республикада мавжуд яйловлардан унумли фойдаланиш, ипак ва жунни қайта ишлашни қўллаб-қувватлаш бўйича қўшимча чора-тадбирлар тўғрисида»ги қарори ҳудудларнинг табиий-иқлим шароитларидан келиб чиқиб, майда шохли молларни кўпайтириш, озуқа базасини ривожлантириш, тери ва жунни қайта ишлаш, улардан ярим тайёр ва тайёр маҳсулотлар ишлаб чиқаришни қўллаб-қувватлаш, яйлов майдонларида табиий равишда ўсувчи каврак плантациялари захираларидан барқарор фойдаланиш, шунингдек, пиллачилик тармоғи озуқа базасини кўпайтириш, экспортга мўлжалланган маҳсулотлар ҳажмини оширишга қаратилгани билан аҳамиятлидир.

Халқимиз азалдан чорвачилик ва деҳқончилик, пиллачилик билан даромад топиб, шунинг ортидан оила тебратгани ҳаммага аён. Айниқса, тоғли ҳудудларда яшайдиган аҳоли чорвачилик билан бирга, турли гиёҳларни қуритиб, тирикчилик қилади. Сайлов округимдаги 16 мингга яқин аҳоли айнан тоғли Боботоғ ҳудудида истиқомат қилади. Қарорда белгиланган вазифаларнинг ижроси тоғли ҳудудда яшовчи аҳоли бандлигини таъминлашга, уларнинг даромади ошишига ҳамда тадбиркорлик субъектларининг кўпайишига хизмат қилади.

...Пиллачилик борасида озгина бўлса ҳам тажрибам бор. Бундан 5-6 йил илгари пиллани даромади паст, қийналган оилалар боқарди. Шундай даврлар ҳам бўлдики, бир қути пилла етиштиргани учун бор йўғи бир халта ун, беш литр ёғ ажратилар эди. Пилла ҳосилини топширгандан сўнг маблағини ололмасдан сарсон бўлганларни ҳам кўрдик. Бир қути пилладан 55-60 килограммгача ҳосил олиш мумкин. Бундан кўриниб турибдики, эндиликда икки қути пилла олган оила бир ойда 3 миллион сўмгача даромад олиши мумкин.

Шунингдек, пиллакорни қийнаётган яна бир муаммо бор эди. Бу тут дарахтзорларининг етишмаслиги. Бир қути пилла бир тоннагача барг ейди. Шу боис, озуқа базасини, яъни тут плантацияларини кўпайтириш чоралари ҳам қарорда ўз аксини топди. Энг қувонарлиси, пилла етиштирган кишига меҳнат стажи ёзиладиган бўлди. Бу ҳам эҳтиёжманд оилалар ижтимоий ҳимоясига қаратилган тадбирлардан биридир. Ваҳоланки, бир неча ўн йиллар мобайнида пенсия ёшига етган аёллар иш стажини кимга ёздиришни билмай идорама-идора сарсон бўлишган.

Бизнинг ипак матоларимизга ўзимизда ҳам, хорижда ҳам талаб юқори. Қарорда бу соҳани ривожлантиришда ҳам тадбиркорларимиз, халқимиз учун жуда катта имкониятлар эшиги очиляпти. Жумладан, 2022 йил 1 январдан бошлаб 2025 йил 1 январига қадар ҳар йили етиштириладиган пилла ҳосилининг бир килограмми учун хонадонларда пилла етиштирувчи жисмоний шахсларга республика бюджети ҳисобидан 5 минг сўм миқдорида субсидия ажратилиши, тутзорларни суғориш учун фойдаланиладиган сув ҳажмига сув ресурсларидан фойдаланганлик учун солиқ ставкаси 50 фоиз миқдорида қўлланиши белгиланди.

Эндиликда, Қашқадарё вилоятининг Ғузор ва Деҳқонобод туманлари, Самарқанд вилоятининг Қўшработ тумани ҳамда Сурхондарё вилоятининг Қумқўрғон ва Бойсун туманлари жун йўналишидаги майда шохли молларни етиштиришга ихтисослаштирилади.

Бундан ташқари қарорда Пиллачилик ва қоракўлчиликни ривожлантириш қўмитаси номини Ипакчилик ва жун саноатини ривожлантириш қўмитаси деб номлаш таклифи ҳам ўз аксини топган. Бундан буён мазкур қўмита яйловлардаги доривор ўсимликларни, шу жумладан, каврак ўсимлигини йиғиш, экиш ва етиштиришни жисмоний ва юридик шахслар билан тузилган шартномалар асосида амалга оширилиши ҳам белгилаб берилмоқда.

Жойларда қарор ижросининг таъминланишидан биринчи навбатда оддий одамлар, халқимиз манфаатдор бўлади. Биз депутатлар эса, қарор ижросини таъминлашда парламент назоратини кучайтирамиз.

Мазкур қарорнинг қабул қилиниши пиллачилик, чорвачилик соҳасида янги натижаларга эришиш билан бир қаторда, тадбиркорларга кенг йўл очилишига, янги иш ўринларининг яратилишига ва мамлакатимиз экспорт салоҳиятининг ўсишига хизмат қилади.

Мавжуда ҲАСАНОВА,
Олий Мажлис Қонунчилик палатаси депутати