Финляндия июль ойидан бошлаб Европа Иттифоқи тасарруфидаги парранда гриппига қарши вакциналарнинг биринчи партиясини олади. Бу ҳақда «Politico» нашри хабар берди.

«H5N1» (парранда гриппи)га қарши вакцинанинг биринчи партияси 640 минг дозани ўз ичига олади. Ушбу вакцина одамларни парранда гриппининг сўнгги ҳалокатли штаммидан ҳимоя қилишга қаратилган.

Европа Иттифоқининг Соғлиқни сақлашдаги фавқулодда вазиятларга тайёргарлик кўриш ва жавоб бериш бошқармаси ушбу вакцина билан таъминлаш учун «CSL Seqirus» билан шартнома имзолаган. Шартнома аниқ шартлари келаси ҳафтагача аниқ бўлади. Маълум қилинишича, вакцина етказиб берувчи ширкат тўрт йил давомида 15 та мамлакатга 40 миллион дозагача дори етказиб беради.

Вакцинанинг биринчи партиясини қабул қилиш учун Финляндия танланган. «CSL Seqirus» янгиланган препаратни ишлаб чиқаришни, етказиб беришни ўз зиммасига олган.

Ушбу ташаббус Европа Иттифоқининг парранда гриппи эпидемиясига тайёргарлик кўришдаги муҳим қадамидир. Ушбу вакциналарни сотиб олиш орқали Европа Иттифоқи аҳолини вирусдан ҳимоя қилишни ва унинг тарқалишининг олдини олишни мақсад қилган.

Аввалроқ дунёда энг кенг тарқалган вирусга қарши вакцина ишлаб чиқилаётгани ҳақида хабар берган эдик.