Глобал иқтисодиётда магний тобора муҳим ресурсга айланмоқда. Электромобиллар, аэрокосмик саноат ва энергия технологияларида енгил ва мустаҳкам материалларга бўлган талаб ортиб борар экани магнийни “келажак метали” мақомига олиб чиқди.

Шу жараёнда Ўзбекистон Технологик металлар комбинати (ТМК) дунёнинг энг нуфузли саноат тузилмаларидан бири – **Халқаро магний ассоциацияси (IMA)**га аъзо бўлди. Бу ҳақда комбинат матбуот хизмати маълум қилди.

Мазкур аъзолик Ўзбекистон саноати учун уч йўналишдаги янги трансформацияни англатади:

Технологик даража – магнийни ажратиб олиш ва юқори қўшилган қийматли маҳсулот ишлаб чиқаришда илғор технологияларни ўзлаштириш.

Илмий ва интеллектуал даража – глобал экспертлар, лабораториялар ва илмий марказлар билан қўшма тадқиқотлар олиб бориш.

Геоиқтисодий даража – Ўзбекистонни магний бўйича глобал таъминот занжирига улаш ва экспорт географиясини кенгайтириш.

ТМКнинг Халқаро магний ассоциациясига қўшилиши Ўзбекистоннинг барқарор саноат ривожланиши йўлидаги навбатдаги қадамдир. Чунки магний қайта ишланиши мумкин бўлган экологик тоза материаллардан бири ҳисобланади.

Комбинат бугун ресурслардан тайёр маҳсулотларгача бўлган қиймат занжирини тўлиқ қамраб олган ҳолда, мамлакатнинг янги саноат концепциясини амалда намоён этмоқда.

Маълумот учун: Халқаро магний ассоциацияси магний соҳасида билим, инновация ва сиёсат чорраҳасидаги йирик платформа бўлиб, унинг таркибида 75 дан ортиқ компаниялар, илмий марказлар ва саноат етакчилари бирлашган.