Фото: «Tengrinews»

Қозоғистоннинг Остона шаҳридаги собиқ «Cinema City» кинотеатри жойлашган бинода ёнғин чиқди. Ижтимоий тармоқларда ҳодиса жойидан олинган видеолар тарқалди, кадрларда бино деярли бутунлай ўт ичида қолганини кўриш мумкин.

Қозоғистон ФВВнинг маълум қилишича, ёнғин бугун, 8 декабрь куни тонгги вақтда Байконур туманининг Аманделди Иманов кўчасидаги павильонда юз берган. Ҳозирда ҳодиса юзасидан дастлабки маълумотлар ўрганилмоқда, жабрланганлар ҳақида мурожаатлар келиб тушмаган.

Қутқарувчилар воқеа жойига кучайтирилган тартибда етиб борган. Соат 09:16 да олов қуршаб олинган ва 09:43 да тўлиқ бартараф этилган. ФВВ маълумотларига кўра, ёнғин содир бўлган вақтда Остонада қор ёғаётгани ўт ўчириш ишларини енгиллаштирган.

«Tengrinews»нинг ёзишича, ёнғиннинг асосий қисми ўчирилган бўлсада, қутқарувчилар хавфсизликни тўлиқ таъминлаш устида ишлашда давом этмоқда.

Қўшимча қилинишича, фаолиятсиз турган уч қаватли бинонинг қўшимча қурилган кафе қисми ва ташқи фасади ёниб кетган. Шунингдек, бино яқинида турган юк машинаси ҳам зарарланган.

Маълумот учун, «Cinema City» 1999 йили очилган ва тахминан 10 йил фаолият юритган. Бу вақт ичида эса у Остонадаги энг оммабоп ҳордиқ чиқариш масканларидан бирига айланишга улгурган.