Истам ИБРОҲИМОВ/«Халқ сўзи». Бухоро вилояти марказидан чамаси 160 километр узоқликда, Қизилқум саҳроси бағрида жойлашган Чуруқ овули ёшларининг сифатли таълим олиш борасидаги имкониятлари кенгайди. Шофиркон тумани ҳудудидаги ушбу масканда 39-умумтаълим мактабининг янгиланган биноси фойдаланишга топширилди.

Бунинг учун маҳаллий бюджетдан 1,5 миллиард сўм миқдорида маблағ сарфланди. Натижада бир пайтлар ёғочдан қурилган бино ўрнида 90 ўқувчи ўрнига мўлжалланган шинамгина ўқув даргоҳи қад ростлади. Муҳими, ўғил-қизларнинг кенг ва ёруғ синфхоналарда таҳсил олиб, замонавий билимларни эгаллаши учун зарур барча шарт-шароитлар яратилди. Ўқув биносини фойдаланишга топширилиши муносабати билан ўтказилган маросимда буни туман масъуллари қаторида мактаб директори Маман Сулаймонов ҳам алоҳида таъкидлади.

Маълумот ўрнида айтиш жоизки, Чуруқ овулида қозоқ миллатига мансуб 270 нафарга яқин киши истиқомат қилади. Бу ерда уларнинг саломатлигини муҳофаза қилиш учун тиббий маскан, рўзғор ташвишларини енгиллаштириш учун савдо шохобчаси ишлаб турибди. Шунингдек, чуруқликлар мобиль алоқа тизими билан ҳам таъминланган.