Видеодан кадр

АҚШнинг «Интер Майами» футбол клуби ва Аргентина терма жамоаси ҳужумчиси Лионель Месси Хитой чегарасидаги паспорт текширувида муаммога дуч келди. Бу ҳақда Rosario нашри хабар бермоқда.

Гап шундаки, Месси Аргентина терма жамоаси билан 15 июнь куни Австралия терма жамоасига қарши ўртоқлик учрашувда иштирок этиш учун Хитойга учиб келган. Аммо у Испания фуқаролиги акс этган паспортда Пекинга учиб келган. Хитойда Испания фуқаролари мамлакат ҳудудига кирииши учун виза олиши керак бўлади. Аргентина фуқаролари эса жуда кўп давлатларга визасиз киргани каби Хитойга ҳам визасиз бориши мумкин. Шу боис терма жамоа маъмурлари бу масалага ортиқча эътибор қаратмаган. Месси эса Аргентина фуқаролиги бўйича паспортини уйида қолдирган бўлган.

Натижада, Пекин чегара пости ходимлари икки соат мобайнида «ПСЖ» собиқ футболчисини ушлаб туришган. Миграция хизмати Мессига тезкор виза қилиб бергач, футболчи қўйиб юборилган.

Эслатиб ўтамиз, Месси бир вақтнинг ўзида Аргентина ва Испания паспортига эга. Европада легионре мақомида эмас, маҳаллий ўйинчи сифатида ўйнаш мақсадида у Европа Иттифоқи учун амал қиладиган испан паспортини ҳам олган.