Мексика армияси “Халиско янги авлоди” картели раҳбари Немесио Осегера Сервантесни (лақаби “Эль Менчо”) йўқ қилди. Бу ҳақда “Associated Pres” хабар берди.

Маълум бўлишича, “Эль Менчо” Жалиско штатидаги Тапалпа ҳудудида ўтказилган операция чоғида яраланган ва Мехико шаҳрига олиб кетилаётганда вафот этган. Ушбу картель АҚШга катта миқдорда фентанил ва бошқа гиёҳванд моддалар етказиб бериши билан танилган.

Расмийлар маълумотига кўра, картель аъзолари 20 та штатда 250 дан ортиқ нуқтада автомобилларни ёқиб, йўлларни тўсиб қўйган. Жалиско, Мичоакан ва Гуанахуато штатларида камида 14 киши, жумладан етти нафар Миллий гвардия ходими ҳалок бўлган. Гвадалахара шаҳрида мактаблар ёпилган, жамоат транспорти тўхтатилган.

Операция тафсилотлари ва халқаро ҳамкорлик

Мамлакат мудофаа вазирлигига кўра, операция вақтида ҳарбийлар ўққа тутилган, тўрт нафар гумонланувчи ўлдирилган. Яна уч киши, жумладан Осегера Сервантес, олган жароҳатлари оқибатида вафот этган. Икки нафар шахс қўлга олинган, зирҳли автомобиллар ва оғир қуроллар мусодара қилинган. Уч нафар ҳарбий жароҳат олган.

Илгари АҚШ Давлат департаменти “Эл Менчо”ни қўлга олиш учун 15 миллион долларгача мукофот эълон қилган эди. 2025 йил февраль ойида АҚШ маъмурияти ушбу картелни хорижий террорчи ташкилот сифатида рўйхатга олган. Шу боис ушбу операцияга АҚШ ҳукумати разведка ёрдамини кўрсатгани тахмин қилинмоқда.

Картелнинг қудрати ва жиноий фаолияти

CJNG 2007 йил атрофида ташкил топган бўлиб, Мексикадаги энг қудратли ва тез ривожланган жиноий тузилмалардан бири ҳисобланади. У АҚШнинг барча 50 штатида фаолият юритиши қайд этилган. Картель кокаин, метамфетамин ва айниқса фентанил ишлаб чиқариш ҳамда тарқатиш орқали миллиардлаб даромад топган.

Осегера Сервантес 1990 йиллардан буён наркотрафик билан шуғулланган. У 1994 йил АҚШнинг Калифорния штатида героин тарқатиш бўйича айбланиб, қарийб уч йил қамоқ жазосини ўтаган. Кейин Мексикага қайтиб, жиноий фаолиятини давом эттирган ва бир неча бор АҚШ судлари томонидан айблов эълон қилинган. Унга қарши 2022 йил 5 апрелда гиёҳванд моддаларни АҚШга ноқонуний олиб кириш ва қурол ишлатиш бўйича навбатдаги айблов қўйилган эди.