Иллюстратив фото

Лондонда Украина бўйича ташқи ишлар вазирлари даражасидаги музокаралар қолдирилди. Бу ҳақда Буюк Британия ташқи ишлар вазирлиги баёнотига таяниб «France Presse» агентлиги хабар тарқатди.

«Украина бўйича тинчлик музокаралари доирасидаги ташқи ишлар вазирларининг учрашуви бугун қолдирилди. Расмий даражадаги музокаралар давом этади», — дейилади мақолада.

Олдинроқ «Sky News» телеканали Буюк Британия ташқи ишлар вазири Дэвид Лэмми, Франция ташқи ишлар вазири Жан-Ноэль Баррот ва Германия ташқи ишлар вазири Анналена Бербок АҚШ Давлат котиби Марко Рубио ва АҚШ президентининг махсус вакили Стив Уиткоффнинг Лондонга ташрифини бекор қилинганидан кейин Украина бўйича музокараларда қатнашмасликка қарор қилгани ҳақида хабар тарқатганди.

АҚШ «The New York Times» газетасининг ёзишича, Рубио Буюк Британияга сафарини Украина президенти Владимир Зеленский Қримни Россиянинг бир қисми сифатида тан олишдан бош тортгани учун бекор қилган. Ғарб матбуотига кўра, бу шарт АҚШ президенти Дональд Трампнинг можарога барҳам бериш режасидаги асосий шартлардан бири ҳисобланади.

АҚШ Давлат департаменти расмий вакили Темми Брюснинг айтишича, АҚШни Лондонда фақат Дональд Трампнинг махсус элчиси Кейт Келлогг вакиллик қилади, Рубио ва Уиткофф эса музокараларда қатнашмайди. «Financial Times» газетасининг таъкидлашича, уларнинг иштирок этмаслиги учрашувнинг аҳамиятини сезиларли даражада пасайтирган.

«The Washington Post» газетасининг ёзишича, Лондондаги учрашувда АҚШ Европа давлатлари ва Киевга Қримни Россия деб тан олишни таклиф қилишни режалаштирган, Украина иттифоқчилари эса бунинг эвазига хавфсизлик кафолатларини олишга умид қилган. Нашр манбаларига кўра, Украина томони ўтган ҳафта Парижда унга тақдим этилган можарони ҳал қилиш бўйича АҚШ таклифини Вашингтон тинчлик жараёнидан чиқишга қарор қилишдан олдинги охирги таклиф сифатида қабул қилган.

Ўз навбатида, «Daily Telegraph» газетасида чоп этилган мақолада АҚШ Украина можаросини тугатиш режасини тайёрлагани ҳақида хабар берди. Бу режа Киев учун хавфсизлик кафолатларисиз етти банддан иборат. Манбага кўра, дастлабки икки банд зудлик билан ўт очишни тўхтатиш ва Москва ва Киев ўртасида тўғридан-тўғри музокараларни бошлашни ўз ичига олади.

Учинчи бандда Украинанинг Европа Иттифоқига қўшилиш имкониятини сақлаб қолган ҳолда НАТОга аъзо бўлишдан бош тортиши қайд этилган.

Тўртинчи ва бешинчи бандлар ҳудудий масалаларга тегишли. Нашрнинг ёзишича, АҚШ Россиянинг Қрим устидан суверенитетини тан олишга, 2022 йилда Россия таркибига кирган тўртта ҳудудни (Херсон, Запорожье вилоятлари, Донецк Халқ Республикаси, Луганск Халқ Республикаси) амалда Россия Федерацияси назорати остидаги деб тан олишга тайёр.

Олтинчи банд АҚШ ва Украина ўртасида ресурс шартномасини имзолашни ўз ичига олади. Еттинчи бандда Москва ва Вашингтон ўртасида янги муносабатлар ўрнатиш, энергетика соҳасида ҳамкорлик ва Америка санкцияларининг барчаси бекор қилиниши мумкинлиги кўзда тутилган. Режада Запорижье атом электр станциясини АҚШ назоратига ўтказиш таклифи ҳам мавжуд.