Ботир МАДИЁРОВ/«Халқ сўзи». Фарғона вилоятининг Фурқат туманида Корея Республикаси компаниялари томонидан ёғоч чиқиндилари ва қишлоқ хўжалигининг қўшимча маҳсулотларидан фойдаланган ҳолда биоэнергия ишлаб чиқариш таклифи илгари сурилмоқда.

Шу йилнинг 14-15 июнь кунлари Корея Республикаси Президенти Юн Сок Ёлнинг Ўзбекистонга амалий ташрифи ва Тошкент шаҳрида ўтказилган Ўзбекистон—Корея бизнес форуми доирасида ушбу истиқболли лойиҳа юзасидан ўзаро келишувга эришилди.

Юзма-юз мулоқотда «KOREA INVESTMENT & SECURITIES» компанияси номидан департамент менежери Хонг Сеунг Хюн, «KOREA WESTERN POWER» компанияси департамент бош менежери Парк Жонг Пил, «KOREA INSTITUTE FOR CLIMATE CHANGE» компанияси президенти Шин Ёнг Вон ҳамда Фурқат тумани ҳокимлиги томонидан мазкур лойиҳаларни амалга ошириш мақсадида меморандум имзоланди.

— Дастлаб умумий қиймати 3 миллион доллар бўлган биочиқиндилардан брикет ишлаб чиқариш лойиҳаси ҳаётга татбиқ этилади, — дейди Фурқат тумани ҳокими Жаҳонгир Жуманов. — Кейинги босқичда иқтисодиёт тармоқлари учун муҳим манба бўлган муқобил энергия ишлаб чиқариш лойиҳасини амалга ошириш режалаштирилган.