Одилбек Одамбоев/«Халқ сўзи». Хоразм вилоятига қарашли Тупроққалъа массиви вилоят марказидан қарийб 200 км узоқликда жойлашган. Ҳудуддаги Тупроққалъа маскани, Ҳазорасп, Саримой, Нукус маҳаллаларида 13 минг нафардан ортиқ аҳоли истиқомат қилади.

Аҳоли муаммоларини ўрганиш ва самарали ечим топиш мақсадида Тупроққалъада вилоят ҳокимининг сайёр қабули ўтказилди. Қабулда фуқароларнинг уй-жой, ишга жойлашиш, даволаниш учун моддий ёрдам олиш, йўлларни таъмирлаш каби масалалар юзасидан мурожаатлари тингланиб, қонуний ҳал этилди.

Шу ҳудудда яшовчи Шаҳноза Матёқубова 5 нафар фарзанднинг онаси. Ўз уйига эга эмаслиги боис йиллар давомида ижарама-ижара қийналиб келаётганди. Унинг уй-жой таъминоти бўйича мурожаати шу куннинг ўзидаёқ ижобий ечимини топди. Эҳтиёжманд оилага ҳудудда барпо этилган кўп қаватли уйдан 3 хонали янги квартира имтиёзли тарзда ажратилди.

– Уй-жой қилишга имкониятим бўлмагани сабабли йиллар давомида болаларим билан ижара уйларда сарсон бўлдик, – дейди Шаҳноза Матёқубова. – Президентимизнинг ижтимоий ҳимояга муҳтож оилаларга кўрсатаётган ғамхўрлиги туфайли ўз уйимизга эга бўлдик. Янги уйга кўчиб кирганда фарзандларимнинг қувончини бир кўрсангиз эди. Юртимизда инсон қадри улуғлигини, ҳеч ким меҳр ва эътибордан четда қолмаслигига яна бир бор амин бўлдим.

Тупроққалъа маскани маҳалласида қишлоқ хўжалиги маҳсулотларининг арзонлаштирилган савдо ярмаркаси ташкил қилинди. Ижтимоий ҳимояга муҳтож оилаларга озиқ-овқат маҳсулотлари тарқатилди. Вилоятдаги ихтисослаштирилган тиббиёт муассасаларининг 21 нафар юқори малакали шифокорлари томонидан 240 нафар фуқаро чуқурлаштирилган тиббий кўрикдан ўтказилди.