Саминжон ҲУСАНОВ/«Халқ сўзи». Иштиёқ ва қатъий ҳаракат бўлса, катта даромад олиш учун катта шароит бўлиши шарт эмас. Андижон шаҳрида истиқомат қилувчи Узрохон ая Каримова фаолияти билан танишгач, шу фикрга келдик.

— Ҳаммаси тўрт бош қўйдан бошланган, — дейди Узрохон ая. —Томорқамиздаги бодринг ва помидордан олинган фойдага қўй сотиб олганмиз. Ҳисоб-китоб қилиб кўрсак, бу томорқачиликдан кўра яхши даромад бераркан. Шу боис 4 бош қўйни сотиб, 8 бош қўзи харид қилдик. 6-7 ойлик парваришдан сўнг уларни ҳам сотиб, қўйлар сонини оширдик. Ҳозирга келиб томорқамизни қўйчилик фермасига айлантирганмиз.

Қўйларни парваришлаш учун Узрохон ая келинларини ёнига олган. Бир кунда уч маҳал емини бериш, тозалаш ишлари у қадар мураккаб эмас. Бироқ даромади яхшигина.

— Айни пайтда бир ойда 130 бош қўйдан 30 миллион сўмгача даромад оляпмиз, — суҳбатда давом этади Узрохон ая. — Уйдан чиқмаган ҳолда маблағ ишлаб топиш бўйича тўплаган тажрибамизни қўшниларимга ҳам улашиб тураман. Шу тариқа маҳалламизда қўйчилик ривожланиб бормоқда.

Доно халқимиз “Излаган имкон топар”, деб бежиз айтмаган. Кафтдеккина жойдан ҳам унумли фойдаланаётган Узрохон ая Каримова фаолияти бошқаларга ҳам сабоқдир.