Абдулазиз ЙЎЛДОШEВ/«Халқ сўзи». Самарқанд шаҳрида одамлар оилавий ҳордиқ оладиган «Ёшлик» истироҳат боғи болалар учун мўлжалланган ўйин қурилмалари кўплиги билан ажралиб туради. Бундай аттракционларнинг белгиланмаган жойларга ўрнатиб ташлангани, ўзбошимчалик билан ноқонуний қурилган бинолар, боғнинг айрим қисмида тўпланиб қолган маиший чиқиндилар, антисанитария ҳолатлари ноқулайлик туғдириб, дам олувчиларнинг кўнглини хира қилаётган эди.

Самарқанд вилояти ҳокими вазифасини бажарувчи Адиз Бобоев «Ёшлик» истироҳат боғи фаолияти билан яқиндан танишди.

Ўрганиш жараёнида ўйин қурилмаларининг бир-бирига жуда яқин жойлаштирилгани одамларнинг эркин ҳаракатланишига халақит бераётгани, ҳудуддаги баъзи бино ва иншоотлар қаровсиз ҳолатга тушиб қолгани аниқланди. Чиқиндилар олиб чиқиб кетилмагани, айрим дарахтлар сувсизликдан қуриб бораётгани маълум бўлди.

Шу ўринда айтиш керакки, «Ёшлик» истироҳат боғи майдони 5 гектар 44 сотихни ташкил қилиб, ҳудудга 78 та ўйин қурилмаси ўрнатилган.

Вилоят раҳбари самарқандликлар фарзандлари билан оилавий ҳордиқ чиқарадиган боғнинг ачинарли аҳволга келиб қолгани юзасидан танқидий фикр билдирди. Қисқа муддат ичида ҳудудни ободонлаштириш, чиқиндилардан тозалаш, қуриб бораётган дарахтларни суғориш, одамларнинг хавфсизлигини таъминлаш, ноқонуний ўрнатилган ўйин қурилмаларини олиб ташлаш, боғни кўркам ва замонавий масканга айлантириш бўйича мутасаддиларга тегишли топшириқлар берилди.

Шу кунларда белгиланган вазифалар ижросини таъминлаш мақсадида «Ёшлик» истироҳат боғида кенг кўламли ишлар амалга оширилмоқда. Ҳудудни замонавийлаштириш ва фуқароларнинг дам олиши учун янада қулай муҳит яратишга алоҳида эътибор қаратиляпти.