Мустақиллигимизнинг 34 йиллик байрами арафасида Андижон вилоятида қатор ижтимоий ва саноат объектлари ишга туширилиб, аҳоли турмуш фаровонлигини ошириш ва иқтисодий салоҳиятни кучайтиришга қаратилган йирик лойиҳалар амалга оширилди.

Избоскан тумани тиббиёт бирлашмаси ҳузурида замонавий жиҳозлар билан таъминланган янги бино қурилиб, фойдаланишга топширилди. 1 миллиард 300 миллион сўмлик ушбу лойиҳа тиббий хизмат сифатини оширишга хизмат қилади.

“Ипак йўли” эркин иқтисодий саноат зонаси ҳудудида “MPrint Pro” МЧЖ томонидан “Флекс босмахона” номли қадоқлар ишлаб чиқариш корхонаси ишга туширилди. 8 миллион АҚШ доллари қийматидаги ушбу лойиҳа доирасида йил давомида енгил саноат ва автомобилсозлик соҳалари учун 38 миллион дона ёрлиқ ва 30 миллион дона қутилар ишлаб чиқарилиши кўзда тутилган.

Андижон туманида қуёш панеллари ишлаб чиқарувчи янги корхона ҳам ўз фаолиятини бошлади. 1,5 гектар майдонда қурилган, қиймати 20 миллион АҚШ долларига тенг мазкур иншоотда йиллик 180 минг дона қуёш панеллари ишлаб чиқарилади. Маҳсулотнинг асосий қисми қўшни давлатларга экспорт қилинади. Бу ерда 100 та янги иш ўрни яратилди.

Шу билан бирга, Андижон туманида “Молочная радость” номли ўзбек-тожик сутни қайта ишлаш қўшма корхонаси иш бошлади. 5,2 миллион АҚШ доллари қийматидаги мазкур лойиҳа доирасида 200 та янги иш ўрни яратилди.

Андижон шаҳрида эса “Қурилиш материаллари ишлаб чиқариш комбинати” МЧЖ ўз фаолиятини бошлади. Бу ерда маҳаллий ва турк технологиялари асосида 26 турдаги бетон маҳсулотлари ишлаб чиқарилади. Йиллик қувват 150–200 минг куб метр бетон маҳсулотини ташкил этади.

Олтинкўл туманида 2,5 километрдан иборат зовурнинг устини ёпиш ҳисобига тадбиркорлар учун қулай шароит яратилди. Бу ерда 50 та хизмат кўрсатиш ва савдо дўкони фаолият юритиши режалаштирилган бўлиб, 250 та янги иш ўрни яратилади.

Янги корхоналар, инфратузилма ва савдо объектларининг ишга туширилиши вилоят иқтисодиётини юксалтириш, аҳоли бандлигини таъминлаш ва турмуш фаровонлигини оширишда муҳим аҳамият касб этади.

Саминжон ҲУСАНОВ

«Халқ сўзи».