Фото: Халқ сўзи

Келаси баҳордан Сирдарё вилоятида «Яшил макон» умуммиллий лойиҳаси доирасида кўчалар чети, идора-ташкилотлар ён-атрофи ва ҳиёбонларга манзарали ҳамда мевали дарахт кўчатлари билан бир қаторда райҳон ва ялпиз ҳам экилади. Айни чоғда ушбу хушбўй ўсимликлар кўчатларини тайёрлашга ҳозирлик ишлари бошлаб юборилди.

Хусусан, Экология ва атроф-муҳитни муҳофаза қилиш давлат қўмитаси ҳузуридаги Атроф-муҳит ва табиатни муҳофаза қилиш технологиялари илмий-тадқиқот институти олимлари тавсиялари асосида Сирдарё вилояти экология бошқармаси ходимлари ташаббуси билан аҳоли томорқаларидаги иссиқхоналарда 3 миллион дона райҳон ва ялпиз кўчати ўстириладиган бўлди.

Маълумот учун айтиш лозимки, жойларда «Яшил макон» лойиҳаси бўйича экилаётган дов-дарахт турларини танлашда уларнинг хилма-хиллиги, ўтқазилаётган ҳудуднинг тупроқ шароитига мослиги ва ҳар жиҳатдан фойдалилиги алоҳида эътиборга олинаётир. Манзарали дарахтлар билан бирга юз минглаб мевали дарахт кўчатлари экилаётгани эса дастурхонимиз мева-чевага янада сероб бўлишини таъминлайди, албатта.

Аҳмадали ШEРНАЗАРОВ, «Халқ сўзи».