Foto: Xalq so‘zi

Kelasi bahordan Sirdaryo viloyatida “Yashil makon” umummilliy loyihasi doirasida koʻchalar cheti, idora-tashkilotlar yon-atrofi va hiyobonlarga manzarali hamda mevali daraxt koʻchatlari bilan bir qatorda rayhon va yalpiz ham ekiladi. Ayni chogʻda ushbu xushboʻy oʻsimliklar koʻchatlarini tayyorlashga hozirlik ishlari boshlab yuborildi.

Xususan, Ekologiya va atrof-muhitni muhofaza qilish davlat qoʻmitasi huzuridagi Atrof-muhit va tabiatni muhofaza qilish texnologiyalari ilmiy-tadqiqot instituti olimlari tavsiyalari asosida Sirdaryo viloyati ekologiya boshqarmasi xodimlari tashabbusi bilan aholi tomorqalaridagi issiqxonalarda 3 million dona rayhon va yalpiz koʻchati oʻstiriladigan boʻldi.

Maʼlumot uchun aytish lozimki, joylarda “Yashil makon” loyihasi boʻyicha ekilayotgan dov-daraxt turlarini tanlashda ularning xilma-xilligi, oʻtqazilayotgan hududning tuproq sharoitiga mosligi va har jihatdan foydaliligi alohida eʼtiborga olinayotir. Manzarali daraxtlar bilan birga yuz minglab mevali daraxt koʻchatlari ekilayotgani esa dasturxonimiz meva-chevaga yanada serob boʻlishini taʼminlaydi, albatta.

Ahmadali SHERNAZAROV, “Xalq soʻzi”.