Фото: Халқ сўзи

Андижон вилоятининг Избоскан туманидаги Ботиробод маҳалласини “Гулчилар маҳалласи” деб аташади. Бу бежиз эмас. Сабаби, маҳалладаги 640 та хонадоннинг 112 таси гулчилик билан шуғулланади. Шулардан бири Шарифжон Аҳмедов дастлаб яшаб турган ҳовлисидаги томорқасидан унумли фойдаланган. 2018 йили ёш тадбиркор сифатида унга 30 сотих ер майдони ажратилди.

— Шундан 15 сотихида иссиқхона барпо этдик, —дейди Шарифжон Аҳмедов. –Бу ерда Хитой ва Голландиядан келтирилган 80 турдан зиёд гул кўчатларини парваришламоқдамиз. Қолган 15 сотих очиқ майдонда эса маҳаллий гул кўчатлари билан бир қаторда манзарали дарахт кўчатларини етиштиряпмиз. Яқинда синов тариқасида уч туп банан кўчатини ўтқаздик. Айни пайтда уларнинг ҳар бири 30 килограммдан ҳосил тугди. Синовимиз ижобий натижа берса 1 гектар ер майдонида бананзор барпо этишни режалаштирганмиз.

Туманда Шарифжон каби ер билан тиллаша оладиганларни кўплаб учратиш мумкин. Энг муҳими, тумандаги мавжуд 45 мингта хонадоннинг 1513 гектар томорқасида йил давомида уч мартагача ҳосил олишга эришиляпти. Бу уларга қўшимча 20-30 миллион сўм даромад олиш имконини яратмоқда.

Саминжон ҲУСАНОВ, “Халқ сўзи”.