Foto: Xalq so'zi

Andijon viloyatining Izboskan tumanidagi Botirobod mahallasini “Gulchilar mahallasi” deb atashadi. Bu bejiz emas. Sababi, mahalladagi 640 ta xonadonning 112 tasi gulchilik bilan shugʻullanadi. Shulardan biri Sharifjon Ahmedov dastlab yashab turgan hovlisidagi tomorqasidan unumli foydalangan. 2018-yili yosh tadbirkor sifatida unga 30 sotix yer maydoni ajratildi.

— Shundan 15 sotixida issiqxona barpo etdik, —deydi Sharifjon Ahmedov. –Bu yerda Xitoy va Gollandiyadan keltirilgan 80 turdan ziyod gul koʻchatlarini parvarishlamoqdamiz. Qolgan 15 sotix ochiq maydonda esa mahalliy gul koʻchatlari bilan bir qatorda manzarali daraxt koʻchatlarini yetishtiryapmiz. Yaqinda sinov tariqasida uch tup banan koʻchatini oʻtqazdik. Ayni paytda ularning har biri 30 kilogrammdan hosil tugdi. Sinovimiz ijobiy natija bersa 1 gektar yer maydonida bananzor barpo etishni rejalashtirganmiz.

Tumanda Sharifjon kabi yer bilan tillasha oladiganlarni koʻplab uchratish mumkin. Eng muhimi, tumandagi mavjud 45 mingta xonadonning 1513 gektar tomorqasida yil davomida uch martagacha hosil olishga erishilyapti. Bu ularga qoʻshimcha 20-30 million soʻm daromad olish imkonini yaratmoqda.

Saminjon HUSANOV, “Xalq soʻzi”.