Фахриддин БОЗОРОВ/«Халқ сўзи». Тошкент шаҳрида ўтказилиши мўлжалланган тадбир олдидан ташкилотчилар биз журналистларга гул ҳадя қилишди. Жажжигина тувакчасига «Саломатлик ва соф табиат учун» деб ёзиб қўйилган бу гул кайфиятимизни шунчалик кўтариб юборди-ки, уни сўз билан ифодалаш қийин. Кўм-кўк ва чақалоқнинг қўлидек юмшоққина баргларини ушлаб, руҳиятимда нимадир чарақлагандай бўлди.

Дарвоқе, нега ташкилотчилар бизга гул ҳадя қилишганини биласизми? Ҳа, тўғри топдингиз, 2025 йил — «Атроф-муҳитни асраш ва «яшил» иқтисодиёт йили». Совға йил номига жуда ярашиб турибди. Шу хаёллар билан андармон бўлиб турганимизда «Лип» этиб «свет» ўчди. Зал қоп-қоронғи бўлиб қолди. «Баъзи ҳудудларда аҳоли шундай қоронғида яшашади, шуни биз ҳам ҳис қилайлик» дея луқма ташлади бир мухбир аёл. Аммо электр ҳадеганда келавермади.

«Ҳар қандай ёмон нарсанинг ҳам бир ҳикмати бор» деганларидек, аслида «свет» ўчгани яхши бўлди. Тадбир ўтказилаётган бино мутасаддилари «яшил иқтисодиёт»га яъни муқобил энергияга ўтишни эртага эмас, айнан бугун амалга ошириш зарурлигини англаб етади. Ана, ерда қор бўлса ҳам тепамизда офтоб чарақлаб турибди. Қуёшнинг беминнат нурини электрга айлантириш учун қанчадан-қанча молия муассасалари «яшил» кредитлар ажратмоқда.

Бир қўлимдаги мўъжазгина тувакчада яшнаб турган гулга, бир калаванинг ипи каби чувалашиб кетган хаёлларимни йиғиштириб олишга ҳаракат қиламан. Шунда бугун тадбир ўтказилмаслиги ҳақида айтиб қолишди.

Гултувакни кўтариб йўлга тушдим. Худди бу орқали «яшил» иқтисодиётга ўтишни тарғиб қилаётганга ўхшардим. Ҳатто бир аёл уни қўллари билан ушлаб кўриб, «бу гулнинг номи «денежный», чиройлилигини қаранг, худди нимадир деяётгандек бўляпти» деб қувончини яшира олмасди.

Ҳақиқатда бу гул нимадир деяпти. Қулоқ тутаман ва унинг «Одамлар, саломатлик ва соф табиат учун курашинг» деган овозини эшитгандай бўламан...