Фото: ЎФА

Футбол бўйича Ўзбекистон миллий терма жамоаси бош мураббийи Фабио Каннаваро Бирлашган Араб Амирликларининг Дубай шаҳрида бўлиб ўтган ўқув-машғулот йиғинининг аҳамияти ҳақида фикр билдирди.

Унинг таъкидлашича, мундиалда қатнашиш учун ҳаммада имконият мавжуд, фақат буни тушуниш ва ҳис қилиш керак.

«Бу йиғин мен ва штабим учун жуда муҳим эди. Сўнгги тўрт ой давомида ички чемпионатдаги кўплаб ўйинларни кузатдик. Жуда кўп футболчиларни кўрдик ва ушбу йиғин улар билан бевосита ишлаш имкониятини берди. Мен ҳар бир футболчи билан алоҳида суҳбатлашдим, чунки уларнинг фикрини ҳам билишни истадим», дейди бош мураббий.

Италиялик мутахассис Дубайда ўтган йиғин футболчилар учун ҳам мураббийлар штаби учун ҳам катта аҳамиятга эга бўлганини қайд этди.

«Олдимизда Жаҳон чемпионати ва Осиё Кубоги борлигини, демак, ҳамма тайёр бўлиши кераклигини таъкидладим. Ҳар бир футболчи ўзини миллий терма жамоанинг бир қисми эканини ҳис қилиши зарур. Футболда ҳамма нарса тез ўзгаради, жароҳатлар бўлиши эҳтимолдан холи эмас. Жаҳон чемпионатида иштирок этиш учун ҳаммада имконият борлигини тушунишлари керак. Менимча, мазкур йиғин футболчилар учун жуда фойдали бўлди», эди Каннаваро.

Маълумот учун, Фабио Каннаваро жамоаси Дубай йиғини доирасида жорий йилнинг 26 январь куни Хитойга қарши 2:2 ҳисобида дуранг ўйнаган бўлса, 30 январь куни Арманистоннинг «Урарту» клубини 4:2 ҳисобида енгди.