Фото: РИА «Новости»

Datapraxis ва YouGov порталлари Халқаро алоқалар бўйича Европа кенгаши учун ўтказган тадқиқот натижаларига кўра, европаликларнинг бор-йўғи 10 фоизи давом этаётган можарода Украина ғалаба қозониши мумкинлигига ишонмоқда. Йигирма фоиз европаликлар эса Россия ғалаба қозонишига ишонишини билдирган.

Тадқиқот 12 мамлакат — Австрия, Франция, Германия, Греция, Венгрия, Италия, Нидерландия, Польша, Португалия, Руминия, Испания ва Швеция аҳолиси ўртасида ўтказилди.

Респондентларнинг кўпчилиги — 37 фоизининг охир-оқибат битим тузилишига ишончи комил. Украинанинг муваффақиятига Грецияда 2, Венгрияда 4, Италияда 5, Полша, Швеция ва Португалияда 17 фоиз ишонч билдирилди.

“Европа учун можарога аралашишнинг энг яхши сценарийси нима?», деган саволга иштирокчиларнинг 41 фоизи Европа Иттифоқи Киевни Россия билан тинчлик музокараларига ундаши кераклигини айтган.

Европаликларнинг 31 фоизи Киевга ҳарбий ёрдамни давом эттириш ғоясини қўллаб-қувватлади. Тинчлик музокараларини ривожлантириш тарафдорлари Венгрияда 64, Грецияда 59, Италияда 52 ва Руминияда 50 фоизни ташкил этди.

Тадқиқот 2 январдан 19 январгача 17 мингдан ортиқ катта ёшли респондентлар ўртасида ўтказилди.