Якунига етаётган 2024 йил фаолиятимдаги энг омадли, ютуқларга бой ва эсда қоларли йил бўлди. Кўп йиллардан буён ҳунармандчилик билан шуғулланиб келаётган бўлсам-да, бу йил тадбиркор сифатида эътиборга тушдим. Янги-янги муваффақиятларни қўлга киритдим.

Асли водийлик ҳунармандлар оиласида туғилганман. Шаҳрисабзлик худди шундай оилага келин бўлиб тушдим. 2021 йилда турмуш ўртоғим Нодир Маннонов билан биргаликда “Шаҳрисабз ҳунармандлар кластери“ МЧЖга асос солдик. Бугунги кунда корхонамизда ҳунармандчиликнинг олти йўналишига оид 50 турдан зиёд буюмлар ишлаб чиқараяпмиз. Ипак гилам, аъло бахмал, ироқи кашталар тўқиш, заргарлик буюмлари ясаш, миллий либослар тикишни кенг йўлга қўйганмиз. Шу йилдан қўл меҳнати ёрдамида атлас ва адрас ишлаб чиқаришни ҳам бошладик. 50 дона тўқув ускунаси ўрнатганмиз. Шаҳрисабзлик ёшларни, хотин-қизларни ҳунармандчиликка ўргатишда ҳам фаоллик кўрсатиб келяпмиз.

Жорий йилда соҳада амалга ошираётган озгина ишларим ҳукуматимиз томонидан эътироф этилиб, мустақиллигимизнинг 33 йиллиги арафасида Президентимизнинг фармони билан “Фаол тадбиркор“ кўкрак нишони билан тақдирландим. Бу менга янада ишонч, куч ва шижоат бағишлади.

Яқинда Оила ва хотин-қизлар қўмитаси ҳамда Камолиддин Беҳзод номидаги Миллий рассомлик ва дизайн институти ҳамкорлигида ўтказилган “Нафосат – 2024” кўрик-танловининг республика босқичида иштирок этиб, ғолиб бўлдим.

Келаётган 2025 йилда ҳам режаларим улкан. Ҳукуматимиз томонидан биз ҳунармандларга яратиб берилаётган шарт-шароитлардан фойдаланиб, фаолиятимни янада ривожлантириш, кучим, имконим борича юртимиз равнақи йўлида меҳнат қиламан.

Фурсатдан фойдаланиб, барча юртдошларимизни кириб келаётган янги йил билан самимий муборакбод этаман. Юртимиздаги тинчлик ва хотиржамликка ҳеч қачон кўз тегмасин.

Маҳлиё МАННОНОВА,

“Шаҳрисабз ҳунармандлар кластери“ МЧЖ раҳбари.