АҚШ президенти Дональд Трамп Эронда тинч аҳоли иштирокидаги намойишлар зўравонлик билан бостирилса, Америка Қўшма Штатлари бу жараёнга аралашишини маълум қилди. Бу ҳақида «Reuters» нашри хабар берди.

Трамп бу ҳақида «Truth Social» ижтимоий тармоғидаги саҳифасида эълон қилган. Унинг таъкидлашича, агар Эрон ҳокимияти тинч намойишчиларни отиб, куч ишлатиш орқали ўлдирса, АҚШ уларни ҳимоя қилиш учун ҳаракатга ўтади.

«Биз тайёр ҳолатдамиз. Барча имкониятлар ишга туширилган ва ҳаракатга тайёрмиз», — дея ёзган АҚШ президенти.

Бу баёнот Эронда сўнгги уч йил ичида иқтисодий қийинчиликлар сабаб кузатилган энг йирик норозилик намойишлари бир қатор вилоятларда зўравонликка айланиб, бир неча кишининг ҳалок бўлиши ортидан янгради.

Намойишчилар ва хавфсизлик кучлари ўртасидаги тўқнашувлар якшанба куни бошланган норозиликлар кескин кучайганини кўрсатмоқда. Норозиликларга ҳукумат сиёсати натижасида миллий валюта курсининг кескин пасайиши ва товар ҳамда хизматлар нархининг жадал ўсиши сабаб бўлган.

Маълумки, Дональд Трамп биринчи президентлик муддати давомида халқаро ядровий келишувдан чиқишга қарор қилган эди. Шунингдек, 2018 йилдан бошлаб АҚШ Эронга қарши иқтисодий санкцияларни қайта жорий этган. Шу вақтдан бери Эрон иқтисодиёти жиддий қийинчиликларни бошдан кечириб келмоқда.