Фото: Халқ сўзи

— Қабулхонамиз ҳамда туман ҳокимлиги билан ҳамкорликда ўтказилган сайёр қабулларнинг бирида Пўлотчи қишлоғида истиқомат қилувчи аҳолидан ҳудудда мактаб йўқлиги масаласи ўртага ташланган эди, — дейди Ўзбекистон Республикаси Президентининг Когон туман Халқ қабулхонаси мудири Саид Мирзаев. — Аҳволни атрофлича ўргандик. Пўлотчида аҳоли, жумладан, мактаб ёшидаги болалар сони йил сайин кўпайиб бораётгани, бу қишлоқ ўғил – қизлари узоқ йўл босиб, 1-, 7-, 20- умумтаълим мактабларига бориб ўқишга мажбур бўлишаётгани аниқланди. Шундан сўнг Пўлотчида янги мактаб қуриш керак, деган қарорга келинди.

Қишлоқ аҳолисининг кўп йиллик орзуси ушалиши учун нари борса етти – саккиз ой кифоя қилди. Пўлотчида 220 ўринга мўлжалланган янги 24-умумтаълим мактаби барпо этилди. «Обод қишлоқ» дастури асосида қад ростлаган замонавий иншоот қурилиши учун 4 миллиард сўмдан зиёд маблағ сарфланди.

Пўлотчида энди ота-оналарнинг кўнгиллари тўқ. Негаки, фарзандлари шундоқ қўл чўзса етгулик мактабда, замонавий шарт-шароитларда сабоқ олишади.

Айтмоқчи, аҳоли талаб-истакларидан келиб чиқиб тумандаги «Сорғун» маҳалласида ҳам 23-умумтаълим мактабининг 240 ўқувчи ўрнига мўлжалланган янги биноси ва спорт зали қурилиб фойдаланишга топширилди.

Истам ИБРОҲИМОВ, «Халқ сўзи».