Оиламиз педагоглар сулоласи. Отам 40 йил ўқитувчилик қилган. Тўрт опа-сингил, турмуш ўртоғим, қизим-ўғлим, келиним, қўйингки, жами оиламизнинг педагогик стажимиз ҳисобласак, 200 йилдан ошади. Ўқитувчилик бизга шарафгина эмас, ота касбини улуғлаш қадрияти ҳам.

Отам иккинчи жаҳон урушидан қайтгач, овулимиздаги мактабнинг биринчи ўқитувчиси бўлган. Ўша кезлар турли ёшдаги ўғил-қизларга битта ўтовда дарс ўтилган. Кейинчалик 1958 йил ўша пайтлар “хуржун” мактаб дейилган, яъни икки хона бир даҳлизли мактаб қурилган. 1965 йил ҳозирги мактабимизнинг ортидаги мослаштирилган бинога кўчиб ўтилган. 2014 йил мана шу мактабимиз қурилди.

Мактабимизда ўқувчиларнинг аксарияти чорвадорларнинг фарзандлари. Қўни-қўшнисиз отарда ўсган фарзандини биринчи синфга олиб келган ота-онанинг қувонч аралаш хижолатини ҳеч кўрганмисиз? Ана шу қувонч ой сайин ошиб, хижолат чекинади. Устозликнинг, ўқитувчиликнинг шарафи, ҳаловати шунда.

Мамлакатимиз раҳбари ўз фаолиятининг дастлабки кунлариданоқ таълим тизимида туб ислоҳотларни амалга ошириш вазифаларини белгилаб, педагог аввало, оиласининг молиявий масалаларидан хотиржам бўлмоғи, у эртага нима билан тирикчилик қилиш эмас, қандай янгилик киритиш ҳақида бош қотириши кераклигини илгари сурди. Шу асосда биз педагогларнинг жамиятдаги мавқейимиз ошиб бормоқда.

Икки чақириқ халқ депутатлари Навоий вилоят Кенгаши ҳамда Конимех тумани Кенгашига сайландим. 2024 йилда Республика Олий Мажлисига депутат сифатида сайланганим, албатта, бутун ўқитувчиларга халқимизнинг ишончи, эътибори ва меҳрининг ифодаси, деб биламан.

Шунингдек, “Фидокорона хизматлари учун” ҳамда “Дўстлик” ордени билан тақдирланганим мамлакатимиз раҳбарининг алоҳида шахсга эмас, балки бутун таълим аҳлига эҳтиромининг намунасидир. Ушбу мукофотлар менга қанот бағишлади, десам хато қилмайман. Унинг пулига мактабимизда қудуқ қаздирдим. Сув чиқариб бутун ҳовлисини кўм-кўк боғга айлантирдик. Отам раҳматли ўттиз йил бурун эндигина директор бўлганимда ”энди мактаб уйинг бўлади. Уйга эмас, мактабга ташисанг, элга яқин бўласан”, деганди. Эл дуосини олиш олий бахтлигини энди тушуниб етдим. Янги йил халқимизга янги имкониятлар, янги зафарлар келтирсин.

Иба НАРИЗОВА,

Республика Олий Мажлиси депутати.