АҚШ Қимматли қоғозлар ва биржалар комиссияси (SEC) Илон Маскни 2022 йилда «Twitter»нинг катта улушини сотиб олганлиги ҳақда кеч ошкор қилгани учун судга берди.

Вашингтон, Колумбия округи федерал судига берилган шикоятга кўра, Маск «Twitter» акцияларининг дастлабки 5 фоизини сотиб олганини эълон қилишни 11 кунга кечиктирган.

SEC қоидаларига кўра, инвесторлар 10 календарь кун ичида 5 фоиз акцияга эгалик қилиш чегарасини кесиб ўтгани ҳақида хабар бериши шарт. Маск учун бу муддат 2022 йил 24 мартда тугаган.

У хабар берилмаган муддат давомида 500 миллион доллардан ортиқ «Twitter» акцияларини сунъий равишда, арзон нархларда сотиб олган ва шу вақтгача 9,2 фоиз улушга эга бўлган.

Унинг улуши ҳақидаги маълумот ошкор қилингандан сўнг «Twitter» акциялари нархи 27 фоиздан кўпроққа ошди.

SEC Маскдан жарима тўлашни ва ноқонуний йўл билан олган даромадларини қайтаришни талаб қилмоқда.

2022 йил октябрь ойида Маск «Twitter»ни 44 миллиард долларга сотиб олди ва унинг номини «Х» деб ўзгартирди.

Маскнинг адвокати Алекс Спиро SEC даъвосини регуляторнинг ўз мижозига қарши «кўп йиллик таъқиб кампанияси»нинг чўққиси деб атади.