Архив сурат

2030 йилга бориб картошканинг глобал миқёсда етиштирилиши 50 фоизга ўсиб, йилига 750 миллион тоннага етиши кутилмоқда. У ривожланаётган мамлакатларда озиқ-овқат хавфсизлиги стратегияларида ҳамон биринчи ўринда турибди.

Ҳар йили дунё бўйлаб 370 миллион тоннадан ортиқ картошка йиғиб олинишини ҳисобга оладиган бўлсак, унинг нақадар бирламчи эҳтиёжга айланиб бораётганини англаш қийин эмас. Ҳозирда дунё аҳолисининг учдан икки қисми уни истеъмол қилади.

Статистик маълумотларга кўра, Хитой картошка етиштириш бўйича дунёда биринчи ўринда, Ҳиндистон эса иккинчи ўринда туради. Украина сиёсий вазиятларга қарамай учинчи ўринда турибди.

БМТнинг таъкидлашича, етиштирилаётган картошканинг ортиб бораётган ҳажми жуда кўп миқдордаги сувни талаб қилувчи шоличилик муаммосига ечим бўлади. Хитой бу борада биринчилардан бўлиб шоли ўрнига картошка ҳосилини ошириш дастурини ишлаб чиқди.

Экспертларнинг фикрича, картошка етиштиришни кенгайтириш табиий равишда озиқ-овқат муаммосини сезиларли камайтиришга ёрдам беради. Бу борада Нигерия барқарор озиқ-овқат хавфсизлигини таъминлашга қаратилган картошка бўйича беш йиллик стратегик режани тузиб чиқди.

Қўшимча маълумот учун, Ўзбекистонда 2023 йил 3,6 миллион тонна картошка етиштирилган. Бу миқдор 2022 йилга нисбатан 3,8 фоиз кўпдир.