Бўстон туманида дала четларидан унумли фойдаланиш йўлга қўйилди. Ваҳоланки, узоқ йиллар давомида эътибор қаратилмаган бундай ҳудудларнинг 1 квадрат метридан ўртача 9-10 минг сўм фойда олса бўлади. Бу кам миқдордек туюлиши мумкин, бироқ умумий майдон ҳисобидан келиб чиқсак, яхшигина даромад эканига амин бўламиз.

— Дала четидаги фойдаланилмаётган 1,5 гектар майдонга қовоқ эккандик, — дейди “Бўз ипак йўли” фермер хўжалиги ишчиси Хусния Одилова. — Натижаси чакки эмас! Жами 40 тонна ҳосил йиғиб, 120 миллион сўм даромад олишни режалаштирмоқдамиз. Бундан ташқари, 2 км. йўл четига ток эккандик, бу йил ҳосилга кирди. Шунингдек, бодом, олча, шафтоли каби кўчатлар ҳам экканмиз. Улар ҳосилга киргач, даромадимиз янада ортади.

Умуман олганда, ҳар бир қарич ернинг қадрини биладиган бўстонликлар 137 гектардан иборат дала четларига мевали дарахт кўчатлари экишди. Шундан эртаки узум навидан 22 тонна ҳосил йиғилди. Хулоса қилиш мумкинки, шу пайтгача эътиборимиздан четда қолган ҳудудлар аслида катта даромад манбаи экан.

Саминжон ҲУСАНОВ,

«Халқ сўзи».