Кеча, 7 январь куни Англия Премьер лигасининг 21-тур ўйинлари бўлиб ўтди. Кун доирасида ўрин олган муҳим баҳсларга тўхталиб ўтамиз.

Кунни очиб берган ўйинда лигада сўнгги ўринни эгаллаб турган «Вест Ҳэм» ва «Ноттингем Форест» жамоалари ўзаро Лондонда тўқнаш келишди. Ушбу ўйинда қўлга киритилажак ғалаба майдон эгаларига очколар сони бўйича «Ноттингем Форест» билан тенглашиб олиш имконини берарди. Амалда эса тескариси бўлди.

Учрашув меҳмонларнинг 2:1 ҳисобидаги ғалабаси билан якунланди. Ғолиблар сафида голларга Морган Гиббс Уайт ва Николас Домингес муаллифлик қилди. «Вест Ҳэм» жамоасининг ягона голи ҳам автогол сифатида «Ноттингем» футболчиси Мурилло ҳисобига ёзилди.

Голларга бой ўтган яна бир баҳс «Бормут» шаҳарчасида бўлиб ўтди. Унда шаҳар номи билан аталувчи жамоа «Виталити» стадионида «Тоттенҳэм» клубини қабул қилди.

Бу жамоалар ҳам турнир жадвалида ёнма-ён боришаётган ва ўйин шу томонлама ҳам аҳамиятли эди. Майдон эгалари эса мазкур баҳсда ғалаба қозониб, «Тоттенҳэм» билан очколар сонини 1 очкога қисқартириб олишга эришди.

Ўйинда ҳисоб 5-дақиқада «Тоттенҳэм» футболчиси Матеус Тел томонидан очилди. Биринчи тайм якунига қадар «Бормут» футболчилари Эли Жуниор ва Эванилсон Лондон клуби дарвозасига 2 та тўп киритишди.

Иккинчи бўлимнинг 78-дақиқасида Жоао Палиния ҳисобни тенглаштирди. Ҳакам томонидан биринчи бўлимга қўшиб берилган бешинчи дақиқада эса яқин орада «Манчестер Сити»га кўчиб ўтиши айтилаётган Антуан Семено «Бормут»га ғалаба келтирган голга муаллифлик қилди.

Лондон шаҳрида ўтган яна бир қизиқарли ўйинда 2 кун муқаддам ўз бош мураббийини истеъфога чиқарган «Челси» клуби «Фулҳэм» жамоаси майдонига сафар қилди. Таъкидлаш жоизки, «Челси» ҳозирда ишлари жойида эмас. Жамоа бу ўйингача қаторма-қатор 4 та ўйинда ғалаба қозона олмай келаётган эди. Бу ўйиндан сўнг эса ғалабасиз серия 5 та ўйинга етди.

Учрашув мезбонларнинг 2:1 ҳисобидаги ғалабаси билан якунланди. Ғолиблар сафида голларга Харри Уилсон ва Раул Хименес муаллифлик қилди. «Аристократлар»нинг ягона жавоб голи эса ўтган турда Абдуқодир Ҳусановни майдон ташқарисида йиқитиб, танқидлар остида қолиб кетган Лиам Делап ҳисобига ёзилди.

Бош мураббийини истеъфога чиқарган яна бир жамоа — «Манчестер Юнайтед» бу тур Бёрнли шаҳрида шу ном билан аталувчи клубга қарши майдонга чиқди.

22 минг мухлисга аталган «Тёрф Мур» стадионида бўлиб ўтган ўйин 2:2 ҳисобидаги дуранг натижа билан якунланди.

«Манчестер Юнайтед»нинг голларига Бенжамин Шешко муаллифлик қилди. Мезбонларнинг жавоб тўплари эса Жейдон Антони ва Айден Ҳевен ҳисобига ёзилди.

Турда энг кўп гол киритилган ўйин эса Ньюкасл шаҳридаги «Сент-Джеймс Парк» стадионида бўлиб ўтди. Унда «Ньюкасл» клуби «Лидс Юнайтед» жамоасини қабул қилди.

Учрашув 4:3 ҳисоби мезбонларнинг ғалабаси билан якунланди. Ғолиблардан голларга Харви Барнс (2 та), Жоэлинтон ва Бруно Гимарайнш муаллифлик қилди. «Лидс»нинг жавоб голлари эса Бренден Ааронсон (2 та) ва Доминик Левин ҳисобига ёзилди.

Турнинг марказий ўйини бугун Лондон шаҳрида бўлиб ўтади. Унда амалдаги чемпион «Ливерпуль» клуби «Арсенал» жамоаси меҳмони бўлади.