Тўрақўрғон тумани пиллакорлари зафар маррасига етиб келдилар. Вилоятда биринчи, республикада ҳам олдингилар қаторида давлатга пилла сотиш шартномавий режаси ортиғи билан бажарилди. 3031 қути қурт уруғидан 167 тонна қимматбаҳо саноат хом ашёси йиғиб олинди.

Пиллачиликни деҳқончилик ҳандалаги дейишади. Туманда бу соҳага қишлоқ аҳлини ижтимоий меҳнатга жалб этишнинг муҳим омилларидан бири сифатида эътибор қаратилаётгани бежиз эмас. Жорий мавсумда ҳам тўрт мингга яқин киши мазкур юмуш билан шуғулланди.

— Бу йил маҳалламиздаги 31 та хонадон ипак қурти парваришлади,-дейди Хўжанд МФЙ раиси Икромжон Исоқов. – Бор-йўғи бир ой давом этадиган мавсум манфаатдорлигини одамлар юракдан сезиб ишлашяпти. Чунки, қурт боқиш энг аввало оилага яхшигина даромад. Қолаверса, пиллакор учун бир йиллик иш стажи.

Қабул манзилгоҳларидагилар тўрақўрғонликлар топширган ҳосилнинг сифатидан мамнун. Қуруқ ва ипакчанлиги юқори бўлган бу пиллаларни тез кунлар ичида қайта ишлашга киришилади ва улар кўзни қамаштирадиган шойи атласга айланади.

Қудратилла НАЖМИДДИНОВ,
“Халқ сўзи”.