Исроил аскарлари Ғарбий Соҳилдаги Женин қочқинлар лагерини кўздан кечириш учун келган 20 дан ортиқ европалик ва араб делегацияси дипломатларига қарата ўқ узди. Бу ҳақида «Al Jazeera» нашри хабар берди.

Билдирилишича, Исроил ҳарбийлари мазкур ҳолатни изоҳлар экан, делегация вакиллари тасдиқланган йўналишдан чиққанлиги сабабли уларга қарата огоҳлантирувчи ўқ узишга тўғри келганини айтишган. Женин шаҳри мэри Исроил ҳарбийларининг бу баёнотини рад этиб, делегация вакилларининг ҳудуд бўйлаб ҳаракатланиш йўналишлари Исроил томони билан аввалдан келишиб олинганини маълум қилган.

Европа дипломатияси раҳбари Кая Каллас мазкур ҳодисани кескин қоралаб, Исроил ҳукумати расмийларидан ҳарбийларининг бу ҳаракатига ҳуқуқий баҳо беришни, тезлик билан тергов ўтказишни талаб қилган. Бундан ташқари, Иордания, Миср, Туркия, Дания ҳамда Қатар расмийлари ҳам Исроил аскарларининг хорижий дипломатларга нисбатан ўқ узганини қоралаган.

Шунингдек, Канада бош вазири Марк Карнининг таъкидлашича, 21 май, чоршанба куни содир бўлган ушбу воқеа юзасидан тушунтириш олиш мақсадида мамлакатдаги Исроил элчиси чақирилган. Элчига Исроилнинг бу ҳаракатини қабул қилиб бўлмаслиги, зудлик билан ҳодисага сабабчи бўлганларни тергов қилиш лозимлиги айтилган.

Хорижий дипломатларнинг Исроил аскарлари томонидан ўққа тутилиши ортидан Мексика ташқи ишлар вазирлиги ҳам ўз муносабатини билдирди.

«Бўлиб ўтган воқеа дипломатик вакилларнинг дахлсизлигини белгиловчи Дипломатик муносабатлар тўғрисидаги Вена конвенциясининг 29-моддаси қоидаларини бузади. Юқорида қайд этилган Конвенцияга аъзо бўлган барча давлатлар, жумладан, Исроил ҳам уни ҳурмат қилишга мажбур», — дейилади Мексика ТИВ баёнотида.

Дастлабки маълумотларга кўра, Женин қочқинлар лагерини кўздан кечириш учун келган делегация аъзоларидан ҳеч ким жароҳат олмаган.